A pustis airi connotu is arresurtaus de s’autopsia, sa Procura de Casteddu at cumandau de torrai a sa familia su corpus de Francisca Deidda, sa picioca asseminesa bocìa a corpu de marteddu, in sa domu aunia biviat in Santu Sparau, de su pobiddu Igor Sollai in su mesi de maju de ocannu passau.
Sabudu chi lompit, est a nai s’undigi de gennargiu, s’at a fairi s’interru de Francisca. E iat essi finas e ora ca su tempus est stetiu meda po ddi torrai sa pagi chi sa picioca minescit. In su fratempus is magistraus ant pediu de giudicai inderetura su pobiddu bocidori, Igor Sollai, camionista de corantatres annus, chi de su cumentzu de su mesi de orgiolas de su 2024 s’agatat acapiau in su presoni de Uta cun sa curpa de airi bocìu sa pobidda e de airi atacau su corpus.
Po s’indagu chi at fat usa Giustissia, Sollai iat airi bociu sa pobidda cun paricius corpus de unu marteddu e, dapoi, pustu su corpu de Francisca a intru de una borsa po ddu atacai in is orus de su caminu statali, beciu, de sa 125, a su costau de unu ponti romanu beciu, in su sartu de Santu Idu: aunia est stetiu agatau tempus a pustis.
A su cumentzu de su indagu, Igor Sollai naraiat de no airi fatu nudda e ca sa pobidda si ndi fut stesiada a sa sola. Ma, su 22 de su mesi de Sant’Andria passau, in presoni, a pustis airi arrespustu a is preguntas de su Pubricu Ministeru Marcu Cocco, at amitiu is curpas suas, nendu de airi bociu sa pobidda, apuntu, a corpus de marteddu. Is abogaus de Igor Sollai ponint a un’ala sa pensada chi sollai teniat giai bidea de bociri, in su mentris chi invecias is indagadoris narant s’imbessi.
Sa curpa, comenti si cumprendit, est de cussas chi a su pubricu ministeru at a fairi pediri su presoni po totu vida, ma at essi su tribunali a decidiri. Po immoi sa sola seguresa est s’interru de sa pobora Francisca, chi non teniat peruna curpa e chi andait sarvada de un’acabbu aici legiu!
Màuru Mura
Mercuris, su s’otu de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.unita.it/2024/07/08/francesca-deidda-scomparsa-san-sperate-marito-fermato-omicidio/
