Galu una lista ufitziali non c’est, ma de pensadas in sa mesa ddue nd’at paricias, aici comenti is pensadas po “dividiri” su numuru de is ministrus intru is partidus chi ant bintu is eletzionis de dominigu passau. A suta is ogus prus atentus abarrant is ministerus prus de importu mannu: sa Farnesina, su Viminali e s’Economia.

Po cust’urtimu in conca de medas s’agatat Fabiu Panetta, chi immoi trabagliat po sa Bce. Est unu de drestra, ma non acapiau a unu partidu in particolari e iat podiri andai finas a su ministeru de is Strangius, domigedda chi castiat cun interessu mannu fintzas Fortza Italia po Tajani, giustu po s’esperientzia chi tenit in custu campu. Ma sighit a si fairi finas su nomini de su ministru beciu Giuliu Terzi de Sant’Agata, eligiu in is listas de is Fradis d’Italia, chi at giai trabagliau in sa Farnesina po su guvernu Monti.

Po su Viminali sa pensada de biri a Salvini parit non balliri prus, ma ddue iaus podiri biri un’omini chi ddi est a su costau, est a nai Mateu Piantedosi. S’alternativa est un’atru prefetu: Gisepu Pecoraro.

Po sa Difesa si fait su nomini de Tajani, chi est, comenti eus giai bidu, in cursa po calencun’atru ministeru. Atrus ministrus de Fortza Italia iant podint essiri Anna Maria Bernini, Elisabeta Casellati e Lucia Ronzulli: po custa dificili su ministeru de sa Saludi, ca non dda pensaiat comenti medas de custu guvernu po su Green pass, probabili forsis su ministeru de s’Istrutzioni.

Lucio Malan, de is Fradis d’Italia, est in “pole” po is relatas cun su Parlamentu, Giulia Buongiorno, de sa Lega, a is Pari Opportunità. Po sa Giustissia si faint is nominis de Carrulu Nordio, de Fdl, e de Nigola Gratteri, chi est stetiu procuradori natzionali de s’Antimafia. Po su chi pertocat is leghistas, ant a tenni unu ministeru po Giorgetti, sempiri chi non ddi dongiant sa Presidentzia de sa Camera.

E iat podiri torrai in Roma fintzas Letizia Moratti, chi immoi est assessori a su Welfare de sa Lombardia: Sanidadi o Cultura is pensadas po issa.

 

 

Màuru Mura

 

 

Martis, su 27 de Cabidanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://moondo.info/il-palazzo-di-montecitorio-e-gli-altri-palazzi-della-camera-dei-deputati/