“Tengiu sa fotografia prus bella de sa vida mia, su coru prenu de gratzias po totus, in conca cussus chi artziendu is ogus a celu non podint ancora biri su matessi celu. No apu mai pensau intru de mimi, in custas bintunu dis, ca oi ia essi in domu. Gratzias”.
Aici Sessilia Sala in su post de unu in X a pustis airi lassau su presoni de Evin in Teheran. Sa fotografia chi at postu in su social dd’amostat candu, calada de cursa de is scaligeddas de s’aparechiu in Ciampino, imbrassat a sa strinta su cumpangiu e giornalista Tanieli Raineri.
Sa nova prus atendia, massimamenti de su babbu e de sa mama, est lompia spantosamenti eriseru in su mengiau adduru diretamenti de Palatzu Chigi: sa gioranlista de su Foglio e de Chora Media fut giai libera e giai setzia in pissu de s’aparechiu chi de Teheran dd’at portada in Roma. Cun Sessilia Sala s’agataiat finas su capu de s’Aise Giuanni Caravelli, chi est lompiu in sa capitali de s’Iran a nde dda pigai.
Po sa giornalista est s’acabbu de unu disacatu chena fueddus, a pustis chi po bintunu dis ce dd’at acabbada a intru de su presoni po is presoneris politigus de Evis. Logu famau in s’orrestu de su mundu po cantu si ddue podit sunfriri. Difatis sa matessi Sessilia Sala fut in dd’una cella, po dognuna de is bintunu dis, chena mancu unu letu aunia si pasai o dromiri. Arregodaus ca sa picioca, nascia in Roma su 26 de mesi de orgiolas de su 1995, est stetia acapiada po una curpa chena sustantzia de violatzioni de is leis de sa Republica Islamica. Totu sa chistioni de custas tres cidas de machimini iranianu, a dogna manera, funt passadas candu Sessilia est lompia in roma, aunia a dd’aspetai si ddue agataiant sa presidenti de su consigliu Giorgia Meloni e Antoni Tajani, comenti de omini de su guvernu italianu chi at tentu custu “arregalu” a pustis un’arregionada diplomatica cun s’Iran.
Màuru Mura
Giobia, su noi de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.collettiva.it/copertine/internazionale/cecilia-sala-e-libera-in-viaggio-verso-casa-v8ahdef1
