Cussu chi est sussedendu intru de sa Palestina cun Israele, e non feti de su seti de mesi de talamini de su 2023, est a suta de is ogus de totus. Disacatu mannu ca funt speddutzendu genti meda e massimamenti genti chi non tenit mancu unu biculu de pani po tirai a innantis. Ma, aici, non parit po totus. Bastat a intendiri cussu chi at nau su capu de Israele, Benyamin Netanyahu, chi cun faci de sola artziat sa bogi: “Is solus chi funt morendusì de famini funt is israilianus chi ant secuestrau is palestinesus”. Ddu at
nau intru de un’atobiu aprontau cun is giornalistas. Su matessi Netanyahu at amostau a totus una fotografia de Evyatar David, unu de is “presoneris” atacau in Palestina, langiu meda cunfroma a candu nde ddu iant liau. Netanyahu, fendu de aici, bolit amostai a totu su mundu ca cussu chi narat Hamas funt totu faulas e ca su famini non ddus bocit.
“Sa guerra podit acabbai finas cras chi Hamas ponit a un’ala is armas e nosi torrat totu is ostagiu chi ancora funt abarraus”, at sempiri nau su “premier” israilianu, ponendu finas in is pumus artus sa chistioni ca Gaza at essi chena armas e sordaus e su matessi Israele at a poderai “sa responsabilidadi intru de sa seguresa”, e chi in Gaza at essi posta una “aministratzioni civili non de seguru israiliana. Custa est sa pensada nosta po sa dì a pustis s’acabbu de sa guerra”, at in segus aciuntu.
Sighendu in custa filera de fueddus, chi andant contras a cussu chi si connoscit, su presidenti at bofiu finas acingiri ca “sa politica nosta est sempiri stetia cussa de non bolli una crisi umanitaria in Gaza”. Israele at cumpartziu cun sa Palestina “giai dus milionis de tonnelladas de agiudus” e de airi mandau “messagius e fatu telefonadas a is citadinus de Gaza po ddus fairi stesiai de su perigulu”.
E tandu de chini iat essi sa curpa?
Màuru Mura
Lunis, s’undixi de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.eunews.it/2025/09/15/netanyahu-ammette-israele-e-isolata-e-accusa-cina-e-qatar-di-propaganda-in-occidente/
