Su Casteddu fait connosciri is ominis chi at essi a su costau de s’allenadori Fàbiu Pisacane in su campionau benienti de su 2025/26. “S’allenadori de dus – si ligit in su paperi de sa sociedadi de su presidenti Tomasu Giulini – at essi Jagu Murelli, chi tenit esperientzia manna de custu trabagli giai in Italia e finas foras de is làcanas, massimamenti in is scuadras de su Bologna, Latziu, Inter, Fiorentina e Milan. Cun is coloris orrubius e nieddus in pissu at bintu su campionau de su 2021/22”.
Po cantu pertocat s’agiudanti tecnicu at essi su spagnolu Alberto Gallego Lancuentra, chi at trabagliau cun Ibiza e Recreativo de Huelva, aunia at bintu is campionaus portendu is duas scuadras in sa serie B de sa Spagna.
A ddus aprontai in su fisicu c’at pensai, invecias, Màuru Baldus, agiudau de Fàbiu Figus e Franciscu Fois. Cust’urtimu at finas a trabbagliai po ponni in peis is giogadoris chi si strupiant.
Po is portieris de su Casteddu at essi Luca Bucci a ddus aprontai. Bucci giai est unu connotu ca fut portieri balenti e in is campionaus professionisticus est calau in campu po 550 bortas, bincendu finas una Coppa Uefa e una Supercoppa. Fut su portieri de tres, a is palas de Pagliuca e Marchegiani, in su Mondiali de is Stadus Unidus de su 1994. De su 2011 aprontat is portieris e at trabbagliau cun su Parma, su Bologna e su CF Montreal – agiudau de Christian Berretta, chi in s’urtimu campionau trababbagliaiat, fendu sa matessi cosa, cun sa “Primavera” de su Casteddu.
Infinis, a aprontai is partidas, comenti de “Match Analysis” ant essi Mateu Battilana e Davidi Marfella, in su mentris chi Giuanni Venturella at essi su “taticu”.
De oi finas sa nova ca is caminus de su Casteddu e de Nereo Bonato, su diretori sportivu chi fut lompiu in su mesi de Sant’Andria de su 2022, si cumpartzint. De cussu chi si narat at essi Guidu Angelozzi a pigai su postu de Bonato.
Màuru Mura
Lunis, su bintitres de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.parmalive.com/news/52-anni-per-giacomo-murelli-vice-di-pioli-con-una-gioventu-targata-parma-103898
