Cun prus de cincuxentus tifosus a ddus castiai e cun Joao Pedro setziu in panchina ca totut s’at a podir narri ma est feti aspetendu sa scuadra noa aunia at a giogai ocannnu chi benit, su Casteddu at serau su ritiru bincendu po 6-1 contras una scuadra chi biat paris giogadoris de Serie D e Eccellenza.

Cun su brasilianu, Liverani lassat a foras finas is portieris Radunovic e Ciocci e galu Nandez, Rog, Lisandru, Tramoni, Palomba e Delpupo. Trabagliu, invecias, po contu su de s’urtimu lompiu Makoumbou.

Duncas Casteddu postu in campu cun su modulu de Liverani, su 4-3-3: Aresti in porta; Di Pardo, Walukiewicz, Goldaniga, Carboni, Deiola, Viola, Lella, Pereiro, Pavoletti e Tramoni. Primu tempus giogau a bellu a bellu, cun d’unu gol de Deiola, a pustis dexi minutus, su Casteddu ddu serrat a innanti po 1-0.

In su segundu tempus is scuadras benint mudadas e sa partida est ancora prus pria. Su Casteddu allonghiat cun Contini e Faragò. Is aversarius cicant de si torrai a ponni in partida cun Aloia, ma is gol de Contini, un’atra borta, Desogus e Luvumbo faint acabbai sa partida cun s’arresurtau de 6-1

Joao Pedro, comenti eus giai nau, s’est allenau a parti ca est po ce dd’acabbai in su campionau turcu cun sa maglia de su Fenerbahce.

Is procuradoris de s’atacanti italu-brasilianu si depint feti ponni de acordiu beni e in is dis chi benint, a pustis annus meda, su capitanu at a lassai sa Sardigna.

Ominis chi andant e ominis chi erribant: s’urtimu allenamentu de Joao at bofiu nai finas su primu allenamentu de su congolesu Makoumbou, chi at postu sa firma in d’unu cuntratu po cuatr’annus cun sa scuadra de sa capitali sarda.

A dispositzioni ant a torrai, coidendu meda, Radunovic, Ciocci cun Tramoni, in su mentris chi Delpupo s’allenaiat intru de palestra e piscina. A un’ala atrus dus giogadoris chi dificili meda eus torrai a biri cun sa magligedda orrubiu-asula de is sardus: Rog e Nandez. Su presidenti cicat de pinnigai prus dinari possibili ca tenint scuadras medas chi ddus bolint.

 

18 de triulas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://www.tuttomercatoweb.com/serie-a/tmw-cagliari-gli-agenti-di-joao-pedro-a-istanbul-per-trattare-con-fenerbahce-e-galatasaray-1706875