“A pustis s’incidenti, Christian, s’atru figliu miu m’at imbrassau a sa strinta e m’at nau custus fueddus: ‘Babbu, babbu. Depis perdonai, ddu depis fairi chena de farta. Poita deu pensu chi finas s’omini chi at bociu a Sara, in cust’ora est sunfrendu’. Aici apu decidiu de ddu perdonai. Certu ca immoi at essi sa giustissia a fairi su propriu caminu”.
Custus funt is fueddus, in dd’una intervista a su Corriere della Sera, de Larentu Piffer, babbu de Sara, sa picioca de dixiannoi annus spera manna de su ciclismu italianu, boddia e bocia a pustis un’atumbu cun dd’una vetura, cenarba passau in su mengianu, in su mentris chi s’allenaiat in sa strada in Mezzocorona, chi s’agatat in sa provincia de Trento. Sara Piffer fut in cumpangia de su fradi chi, duncas, at bidu totu cussu chi est sussediu.
Sempiri in sa matessi intervista su babbu, arregodendu sa figlia: “Fut unu frori, un’arregalu de Deus. Torru gratzias a sa vida de dd’airi tenta po mei. Torru gratzias feti a custu. Fut una picioca chi donaiat sempiri atentzioni candu s’agataiat in pissu de sa bicicleta. Fut finas una picioca sempiri allirga de si podiri allenai cun su fradi, poita non sempiri in donnia ce dda faiant a andai paris. Mi naraiat: ‘Babbu, nosu seus sempiri atentus e donaus crobba manna, funt is atrus chi non funt grand’atentus a nosu’. E, a dolumannu, aici est sussediu. Sara, lassaimiddu aboginai, fut una picioca de oru e fut brava in totu cussu chi faiat”.
Cali funt is fueddus chi iat a bolli nai a chini si setzit a ghiai? “Oi est totu unu Far West – arrespundit – Ia a nai ca serbit prus cuscentzia. A dolumannu si nd’acatant sempiri candu est tropu adduru. Totu po godangiai unu minutu ponint in erriscu sa vida de s’atra genti. Deu biu ca in is camimus est sempiri peus. Ddu biu comenti de autista e mi pongiu in is pannus de is ciclistas, chi funt cussus chi erriscant de prus”.
Màuru Mura
Mercuris, su bintinoi de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://fiabitalia.it/sara-piffer-unaltra-morte-assurda/
