Razvan Marin lassat su Casteddu, bendiu in totu a s’Aek de Atene. Dd’ant serrada in su merì, su Casteddu cun s’Aek, custa compora, finas poita is grecus teniant pressi meda ca depint giogai is primas partidas de Conference League giai custa cida. A su cumentzu su Casteddu non boliat bendiri su giogadori de mesu campu, cun arreiginis rumenas, poita pariat pagu su dinari chi boliant ponni a curriri is dirigentis de s’Aek. Ma, in segus, is duas partis si funt acostiadas e aici Marin at a sighiri su caminu in terra greca. Su rumenu si nd’andat a s’Aek Atene in cambiu de unu milioni de eurus. E, in Grecia, ddu at abarrai po tres annus. Pisacane, est a nai, ddu iat airi agradessiu galu ca Marin est giogadori forti, ma s’erriscu de ddu perdiri ocannu chi benit po nudda, at fatu coidai sa compora.
Marin, torrau a pustis dus annus giogaus cun s’Empoli, cun su Casteddu at giogau po centu undixi bortas e at finas fatu seti gol. Totu intru de campionau de Serie A e sa Coppa Italia.
A lassai sa terra sarda, non feti su rumenu, ma finas Simoni Scuffet chi at sceberau de fairi is bisitas medicas su J Medical, a innantis de s’acapiai, e cumentzai a trabbagliai, cus su Pisa. Immoi su portieri, nasciu in su 1996, at a lompiri in Morgex, in sa Baddi de Aosta, aunia at a connosciri is cumpangius nous ghiaus de s’alleandori nou Arbertu Gilardino. In su campionau passau Scuffet iat cumentzau comenti de meri de porta, ma dapoi at perdiu su postu po calencuntu faddimentu e in segus, in is comporas de su mesi de gennargiu, est passau a su Napoli de Antonio Conte.
A pigai su postu de Scuffet, est lompiu in su arretiru de Ponte di Legno, su portieri de is giovunus Velizar-Iliya Iliev, chi tenit bint’annus e at a trabbagliai paris a Elia Caprile, chi est su portieri primu, Giusepu Ciocci e Boris Radunovic.
Màuru Mura
Lunis su bintunu de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.transfermarkt.it/empoli-senza-freni-arriva-razvan-marin-con-i-riscatti-sono-otto-le-operazioni-fatte/view/news/407322
