Funt imbucaus in contu, in Italia de is ses e unu minutu de mengianu e in is Stadus Unidus de mesunoti e sempiri unu minutu, is datzius Usa contras de atrus norantadus Stadus. Si cumentzat de su 10% po su Regnu Unidu finas a lompiri a su 50% po s’India e su Brasile.
E su matessi Donald Trump, candu est lompia sa mesunoti de su seti de austu, at scritu in su social Truth. E ddu at fatu scriendu a litaras mannas: “Est mesunoti!!! Miliardus de dollarus funt lompendu in is Stadus Unidus de America”. Pagu tempus a innantis iat, invecias, scritu: “Is datzius de una parti e de s’atra ant a imbucai de mesunoti de oi. Miliardus de dollarus, in parti manna de Stadus chi ant aprofitau de is Stadus Unidus po paricius annus, erriendusindi a dogna manera, ant a cumentzai a erribai in domu nostra. Sa sola cosa chi podit frimai s’ammanniamentu de is Stadus Unidus iat essi una Corti de manca chi bolit fairi faddiri sa Natzioni.
Po s’Unioni Europea is datzius funt a su 15% po cuasi totu, a parti s’aciaiu e s’alluminiu po is calis s’alicuota est invecias a su 50%, finas chi funt sighendu is relatas po cicai de mudai calencuna cosa, cunfroma a s’acordiu chi si fut giai pigau. Relatas chi funt strachendu meda, faint sciri de s’Unioni Europea, e in sa cali s’Europa cicat de otenni percentualis meglius, massimamenti po cantu pertocat is prendas de sa cosa de papai e de su binu. Su Canada s’at a agatai a fairi is contus cun su 35% e ancora prus marigosu est su distinu de sa Svitzera, lompia de una percentuali de su 39%. Is natzionis prus postas peus, est a nai cun su 50%, funt su Brasile e s’India. Sa de unu po mori de su processu tropu tostau contras de Bolsonaro e sa de duas po mori ca est tropu amiga de Mosca. Immoi tocat a biri chi Trump at torrai a palas o at a sighiri cun custu chi, po medas, est unu disacatu mannu.
Màuru Mura
Cenarba, s’otu de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.bancagenerali.com/blog/dazi-volatilita-mercati
