A pustis is partidas de eris a merì sa classifica de sa Serie A est immoi prena. In sa parti arta est aancora de decidiri chini at a binciri su campionau. Po s’ora est su Napoli a ghiai, ma s’Inter s’agatat feti a unu puntu e ancora tenit sa spera de torrai a binciri. In su mentris, cun sa vitoria de eris po 2-1, s’Atalanta est segura de si torrai a giogai, ocannu chi benit, sa Champions League. Is atrus postus ant essi de Napoli e Inter e unu intru de Juventus, Latzio e Roma. Invecias, in sa parti bascia, cussa chi pertocat su Casteddu feti su calamentu in Serie B de su Monza po immoi est decidiu. Ma ddi donaus una mirada a ogus prenus a sa zona caglienti de sa classifica. Partenduru de su Casteddu e de su Verona chi s’agatant, paris, a 33 puntus. Dapoi sighit su Parma cun 32 e a sighiri su Venetzia cun 29 e su Lecce cun s’Empoli a 28. A-i custu puntu est de importu mannu sa partida de is piciocus de Nicola contras de su Venetzia de dominigu chi benit. Bincendudedda is casteddaius iant a festai. Ma chi, a dolumannu, si perdit, tocat a castiai is atras partidas: su Parma giogat cun su Napoli, su Verona in domu contras de su Como, s’Empoli at a moviri in Lombardia po si dda giogai cun su Monza e su Lecce si dd’at a biri cun su Torinu.

De importu at essi finas sìurtima giornada candu sa scuadra de Giulini at andai in terra napoletana, su Verona e s’Empoli s’ant atobiai paris, su Parma cun s’Atalanta, su Venetzia cun sa Juventus e su Lecce cun sa Latzio.

In su mentris su Casteddu est torrau a trabbagliai eris in su Crai Sport Center de Assemini, a pustis chi Davidi Nicola at libbertau is giogadoris in sa dì de dominigu, in segus a sa partida perdia cun su Como po 3-1. Ant trabbagliau a parti Pitanu Luperto, Yerri Mina, Florinel Coman e Jakub Jankto. Is dis benientis ant amostai chini de custus at essi a dispositzioni po sa partida cun su Venetzia.

 

 

 

Màuru Mura

 

 

 

Martis, su trexi de maju de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.dazn.com/en-IT/home