Dde custu mengianu, giai de is ses a ora nosta, po cussu chi at nau su Presidenti de is Stadus Unidus, Donald Trump, eus agata sa filera de unu de dd’acabbai cun is armas. Po cantu narat ancora, su matessi Trump, at essi su cumentzu de “s’acabbu de sa guerra”. Chistionendu de custu, sempiri su presidenti, at nau ca “at a passai in sa storia comenti sa guerra de is doixi dis” e s’est allirgau cun is partis assegurendu ca is armas no ant essi umperadas po tempus longu. “Mancu mi ddu podia pensai cussu chi est sussediu”, narat sempiri de sa Domu Arva.
In su noti, in su mentris, si funt intendias esplosionis in partis diversas de sa capitali de s’Iran chi, non si funt fatu pregai a arrespundiri in Tel Aviv. E dapoi de is fueddus de Trump is sirenas ant sonau galu in Israele. “Po immoi no esistit perunu acordiu po dd’acabbai cun is armas. Eus a nai ca chi is israilianus dd’acabbant cun is missilis, nosu non teneus peruna bidea de sighiri a arrespundiri”, scrit in X su ministru de is Esterus de s’Iran Abbas Araghchi. Su matessi ministru at, a pustis, sighiu: “Is operatzonis militaris de is potentis Fortzas iranianas, po puniri Israele, funt sighias finas a s’urtimu minutu, est a nai finas a is cuatru de custu mengianu”.
Oi, intru de atru, s’ant atobiai cussus de su Consigliu de seguresa de s’Onu chi ant a chistionai de su programa nucleari iranianu
In su fratempus, tres ominis israilianus si funt mortus, po mori de un’atacu cun missilis de s’Iran, in Beer Sheva, in sa parti de basciu de sa natzioni de Netanyahu, calencuna ora prus addei de is fueddus de su presidenti de is Stadus Unidus. Ddu narat su giassu de Haaretz, in su mentris chi is sirenas sonant in parti manna de su Stadu. Est finas a nai ca, po cantu narant atrus giornalis e televisionis, atras bintiduas personis funt lantiadas.
Màuru Mura
Martis, su binticuatru de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://edition.cnn.com/2025/06/23/politics/trump-iran-strikes-regime-change-analysis
