De custu mengianu chini bolit saludai a Paba Franciscu, mortu lunis passau e chi iat lompiu is 88 annus in su mesi de idas, si podit acostiai in sa Basilica de Santu Perdu. Ant essi in medas e ant a lompiri giai in milli e sexentus de sa Sardigna
Totu at addurai finas a cenarba, su 25 de arbili, a is otu de merì candu su cardinali Kevin Joseph Farrel at a cumandai sa pregadoria de sa serrada de su baullu de Franciscu. A s’interru ant a pigai parti, in prus de su Farrel, is atrus cardinalis Giuanni Batista Re, decanu de su Collegiu Cardinalitziu, Roger Michael Mahony, Dominique Mamberti, Mauru Gambetti, Perdu Parolin, Baldassarre Reina e Konrad Krajewsk; is piscamus Edgar Pena Parra, Ilson de Jesus Montanari, Lionardu Sapienza. E dapoi finas is Canonicus de su Capitolo Vaticano, is Penitenzieri Minori Vaticani Ordinari, is segretarius de su Paba mortu e atrus amitius de su Maistu de is Celebratzionis Liturgicas Pontificias.
Funt, invecias, prus o mancu centusetanta is delegatzionis strangias chi ant a lompiri sabudu a mengianu in su Vaticanu po s’interru. Su presidenti de is Stadus Unidus Donald Trump, acumpangiau de sa pobidda Melania, in su viagiu de unu de candu est diventau un’atra bia presidenti, sa presidenti de sa Cumissioni Europea Ursula von der Leyen, cussa de su parlamentu europe Roberta Metsola e cussu de su Consigliu europeu Antoni Costa, ant essi intru de is primus.
In Roma at a lompiri finas Volodymyr Zelensky acumpangiau de sa pobidda Olena, ma non si ddue at agatai Vladimir Putin, chi intru de atras chistionis tenit unu cumandu de acapiu de sa Corti penali internatzionali po sa guerra contras de s’Ucraina.
Su Cremlinu depit galu decidiri chini mandai, ma de seguru si ddue at amostai Antoni de Volokolamsk, responsabili de is relatas strangias de sa Cresia russa, chi fut amigu de su Paba.
Màuru Mura
Mercuris, su bintitres de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ansa.it/sito/notizie/cronaca/2025/04/23/le-immagini-del-rito-della-traslazione-della-salma-di-papa-francesco_e07c3d86-94c0-4e45-93aa-f5676f2bd28b.html
