Dus trabbagliadoris de s’ambasciada de Israele funt stetius bocius a corpus de pistola in su foras de su Jewish Museum de Washington. Chini at umperau custa manera po morrungiai contras de cussu chi de tempus meda est sussedendu inntru de Israele e Palestina est unu piciocu de trint’annus de Chicago: Elias Rodriguez est su nomini.
Po cussu chi ant nau is funtzionarius ascurtaus de is televisonis e de is giornalis, un’omini fut passillendu in is orus de su Jewish Museum de Washington a innantis de cumentzai a sparai, boddendudendi un’omini e una femina. S’omini incurpau iat airi aboginau a forti “Palestina liberta”, massimamenti candu ddu ant acapiau is fortzas de s’ordini americanas.
“Custa manera de fairi, cun genti bocìa intru de sa chistioni chi andat contras de is ebreus, depint acabbai e custa est s’ora de ddu fairi!”, at scritu in Truth su presidenti de is Stadus Unidus de America, Donald Trump. “Odiu e radicalismu – aciungit sempiri in Truth su presidenti – non si podint agatai in is Stadus Unidus. Passientzias mannas a is familias de is mortus. Candu pensu ca disacatus aici podint ancora sussediri, est tristu meda. Chi Deus bosi beneigiat a totus!”.
De Israele, a faci manna, su presidenti Benyamin Netanyahu narat ca is mortus de Washington est cussu chi ndi benit a foras de “s’insugliu” contras de Israele. At finas fatu sciri de airi cumandau a totu is ambasciadas de Israele, spainadas in totu s’orrestu de su mundu, de ponni in seguresa manna sa genti chi ddue trabbagliat.
“Cussu chi est sussediu in foras de su Jewish Museum di Washington, cun sa morti de un’omini e de una femina, est una chistioni de terrorismu contras de su populu de Israele” at scritu in X s’ambasciadori israilianu in is Natzionis Unidas, Danny Danon, aciungendu finas: “Candu si fait mali meda a sa comunidadi ebraica bolit nai a giumpai una linia orrubia. Teneus fidi manna chi is autoridadis de is Stadus Unidus – acabbat de scriri – facant su doveri insoru e cundennint comenti si depit su vili chi at sparau. Israele at a sighiri cale chi siat citadinu ebreu in totu su mundu”.
Màuru Mura
Giobia, su bintidus de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.gazzettadimantova.it/news/mondo/sparatoria-fuori-dal-museo-ebraico-di-washington-morti-due-diplomatici-israeliani-1.12687430
