At essi Fideli La Penna, de sa filera de Roma 1, a fairi cumentzai e acabbai sa partida de cenarba chi benit in su stadiu Diegu Armando Maradona de Napoli. Totu at a cumentzai a is noi oras mancu unu cuartu e in Como, arbitrada de Davidi Massa de sa filera de Imperia, at a giogai s’Inter. Is duas partidas, chi ant a serbiri po amostai sa scuadra Campioni de s’Italia, s’’ant a giogai cenarba po mori ca s’Inter tenit, su trintunu de maju, sa finali de Champions League cun su Paris Saint Germain. Est a nai ca aici is interistas s’ant a podiri pasai unu pagu de prus.
Con La Penna si ddue ant agatai is assistentis Alissandru Giallatini e Valeriu Colarossi. Ambos, finas custus, funt de sa filera de su matessi arbitru, cussa de Roma 1. S’uficiali de cuatru Mateu Marchetti de Ostia Lido e in su Var Tanieli Paterna de Teramo, assistiu de Rosariu Abisso de Palermo. Cun s’arbitru romanu, su Casteddu at tentu tres vitorias (s’urtima est cun sa Ternana, po 2-1, su 30 de arbili de su 2023), cuatru paregius (s’urtimu est cun s’Empoli, po 0-0, su ses de arbili passau) e ses partidas perdias (est a nai finas s’urtima bia chi at atobiau su Napoli, po 0-4, su 15 de cabidanni de ocannu passau.
In su fratempus, a pustis airi festau dominigu passau bincendo po 3-0 cun su Venetzia, su Casteddu, a innantis de s’acabbu de su campionau, at torrau a trabbagliai eris in su Crai Center de Assemini. Funt tres is giogadoris de su Casteddu chi, in is annus passau, ant bestìu sa magligedda de su Napoli: Caprile, chi est lompiu feti in gennargiu, Gaetano e Luperto. Custus urtimus dus si funt pesaus in su matessi Napoli ma, Giuanniluca Gaetano erriscat de non ce dda fairi ca tenit dolu a su genugu de manca chi po tempus ddu at poderau in pasamentu. Oi is piciocus de Nicola ant a sighiri a trabbagliai po cicai de guastai sa festa a su Napoli.
Màuru Mura
Mercuris, su bintunu de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.calcionapoli24.it/serie_a/ufficiale-il-cagliari-salvo-arriver-a-napoli-senza-obiettivi-in-n647019.html
