Palermo strinta in su lutu po sa morti de Totò Schillaci, su giogadori chi in Italia 90 sparessiu mercuris a mengianu po mori de unu cancru e ingiriu de s’amori de sa pobidda Barbara e de is figlius Mattia, Jessica e Nicole, is primus dus tentus cun sa prima pobidda Rita.
Pesau in su popolari cuartieri Cep de sa citadi, a Schillaci Palermu ddi rendit onori cun s’aposentu po ddu saludai bofia de su Cumunu e aprontada in s’aposentu de sa stampa de su stadiu Barbera, oberta a is bisitas finas po totu sa di de eris.
A ddu saludai est lompia totu sa scuadra de su Palermu, totu is istitutzionis politigas de sa citadi, ma prus che a totu genti de dogna idadi, citadinus cumunus e finas familias intreas.
Comotzioni manna e fueddus pagas, ma intendias de parti de sa genti: “At a fairi gol finas in cielu”, “Ddu ant pigau po giogai in Paradisu”, “Unu campioni de sa genti, at abarrai in sa storia”.
Oi, in sa catedrali de sa capitali siciliana, s’at a tenni s’interru religiosu. S’arcipiscamu de Palermo, Corrado Lorefice, ddu at giai arregodau: “SA citadi de Palermo perdit unu simbulu de riscatu. Unu piciocu de arreiginis umili chi ce dd’at fata a s’oberri unu caminu cun barra e gana, finas a diventai unu simbulu de su sport”.
A pustis airi giogau, Schillaci non s’est tirau a palas e at trabbagliau finas po sa televisioni e at fatu, finas chi po pagu, su consiglieri comunali. Ma est abarrau sempiri in su mundu de su fubalu, chi at contau sempiri, ddu ant tentu a sa stesiada de is cumpangias malas. In su 2000 nd’at pesau sa scola de fubalu de su Ribolla, in su caurtieri Borgo Nuovo, acanta a-i cussu aunia est cresciu. Non s’est mai postu de una parti in chistionis de solidariedadi, intru de is medas una a su costau de su Comitau “Addiopizzo”, chi aici ddu at saludau: “Schillaci a innantis de essiri unu grandu giogadori est stetiu e abarrat unu piciocu chi non si nd’at mai scaresciu is arreginisu suas e at bofiu intregai parti de sa vida sua a is cuartieris de aunia lompiat”.
Màuru Mura
Cenarba, su binti de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilfattoquotidiano.it/2024/09/18/toto-schillaci-morte-news/7697905/
