“Bosatrus seis de sa parti de ‘Giuseppi’ o andais contras”.

Seus in sa Casa Bianca, mesi de talamini de su 2019, Salvini iat fatu orruiri su guvernu grogubirdi e funt giai pensendu de torrai a ponni Conte comenti de Presidenti de su Consigliu. Donald Trump pregontat custu a Luisu Di Maio, chi s’agataiat in Washington paris a Mattarella: “Non teniat in conca cun chini fut fueddendu e forsis non sciat mancu chini teniat in denanti”. Totu custu benit scritu in su libru de Di Maio “Un amore chiamato politica”, bessiu in custas urtimas dis.

“Candu dd’apu nau de biri sa calidadi de s’impignu de s’Italia cun sa Nato, Trumpu m’at arrespustu cun d’unu errisu: ‘Custas funt chistionis chi si podiant fairi cun Obama, po mei contant feti is dollarus’”, si ligit ancora in is paginas de su libru.

Di Maio chistionat de comenti est erribau de is prassas a diventai ministru.

Totus s’arregodant de cussus fueddus chi iat umperau una borta chi su “reddito di cittadinanza” est diventau lei: “Eus bintu sa poberesa” e de custu Di Maio si nd’est pentiu: “Apu faddiu, cussa dì a bessiri in corridoriu po nai cussus fueddus”.

Contat puru de is fueddus bonus chi ddi at nau Berlusconi e in segus chistionat de Renzi e de Salvini. Su primu ddu incurpat de no airi fatu sa parti sua po andai, paris, a su guvernu in su 2018 e ddu incurpatu finas de airi faru orruiri su segundu guvernu de Conte. De Salvini invecias narat ca “est unu de is prus fartzus chi apu atobiau in sa vida mia”. E, a pustis, chistionat de sa telefonada in su mesi de austu de su 2019, a innantis de sa bessida de sa Lega de su Guvernu.

Una stocada fina po Conte: “No apu mai cumprendiu poita po calencunu fut meglius a guvernai cun cussus chi beniant lamaus ‘responsabilis’ chi andaiant de Clemente Mastella a Luisu Vitali de Fortza Italia invecias de sighiri a ddu fairi cun nosu, ca ddi podiaus permitiri de sighiri sa bataglia nosta e finas de ddu fairi abarrai in Palazzo Chigi”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.fanpage.it/cultura/sta-per-uscire-un-amore-chiamato-politica-il-primo-libro-di-luigi-di-maio/