Su ministru de s’Internu britannicu Priti Patel at donau cumandu de fairi processai Julian Assange in is Stadus Unidus. S’urtimu fueddu de parti de sa responsabili de s’Home Office, chi fut, a cantu parit scontau, erribat de fatu chi in Gran Bretagna iat fatu totu su chi ddue fut de fairi in pissu de su contu de s’ativista australianu, chi erriscat de passai dis medas in presoni in is Usa po airi difundiu, aintru de sa piataforma Wikileaks, documentus segretus chi chistionaiant finas de is criminis de gherra de is americanus in Afghanistan e Iraq.
Inderetura sa reatzioni de WikiLeaks chi at nau ca “Est una dì scuria po sa libertadi de sa stampa”. De”Una dì niedda” non feti po sa libertadi de stampa, ma finas po sa democratzia britannica at chistionau finas Stella Morris, s’abogada sudafricana, specialista po is diritus umanus chi at donau dus figlius a Julian Assange in su fratempus chi s’agataiat in s’ambasciada de s’Ecuador in Londra e ddu at de fatu cojau in is mesis passaus in su presoni de Londra de Belmarsh.
At aciuntu sa Morris: “Chini e chi siat in custu Stadu tengiat in su coru sa libertadi si depit sbregungiai meda”, chini at donau su permissu est unu Stadu chi at fatu de totu po bociri Assange. Julian no at fatu nudda de sbagliau, est unu giornalista e un’editori puniu feti po airi fatu su doveri su, donendu is novas de documentus chi poniant in lugi mala Stadus chi si naranat democraticus”.
E galu: “Priti Patel teniat su poderi de fairi sa cosa giusta, invecias at essi arregodada comenti cussa de airi agiudau is Stadus Unidus, de su progetu de fairi de su su giornalismu investigativu un’impresa criminali”.
Po sa Morris, a dogna manera, finas chi “su caminu po sa libertadi de Julian est longa meda”, sa bataglia “no acabat aici”: a partiri de s’apellu a s’Alta Corte de Londra e de is morungius chi ant essi in totu is prassas de su mundu.
22 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.nanopress.it/articolo/johnson-ordina-lestradizione-di-julian-assange-negli-usa/371706/
