Antonello Lai non ce dd’at fata e eris a pusti prangiu ses mortu. Su giornalista, po totus connotu comenti de Tziu Lai, ci poniat sempiri sa faci po difendiri is categorais prus debilis. Feti po custu iat essi onori mannu a ddi torrai gratzia. Ma, a donai una mirada in totu is social, sa genti cumuna e non feti, ddu funt fendu, poita Antonello si ddu minisciat.
S’agataiat in su spidali Brotzu de Casteddu de prus de duas cidas po problemas a su coru. A pustis chi sa chistioni pariat meglius, dapoi de una operatzioni, s’est torrau a intendiri mali. Est depiu torrai a suta is ferrus de is dotoris, ma, a dolumannu, custa borta non ce dd’at fata. Sa pobidda Claudia fut aspetendu novas acapiadas a cust’atru interventu. Est a nai ca is dotoris ce dd’ant posta totu po ddu sarvai, ma a s’acabbu de is contus si funt arrendius.
Antonello fut connotu de totus ca nd’iat pesau una trasmissioni famada meda in totu sa Sardigna, “Zona Franca”, aunia dogna dì donaiat bogi a is poburus e a is malassortadus: de chini biviat in is domus popolaris cun is sorigus a trumas e cun sa bovida chi ndi fut calendu, a sa genti chi non teniat trabbagliu e sunfriat. De non scaresciri finas is malaidus, is becius e is giovunus in dificultadi manna. Antonello, bastaiat a ddu lamai, e lompiat po cicai de agatai finas una solutzioni.
Sa cida passada fut stetius cussu chi ddu agiudaiat in donnia, Chicco Lecca, a avertiri totus ca Antonello fut postu mali. In is urtimas dis is cunditzionis de su giornalista funt abarradas ogualis e s’agataiat in s’aposentu de Rianimatzioni. Eris, comenti una nui, Antonello s’est intendiu mali e is dotoris no ant possiu fairi nudda po ddu sarvai. Custa borta su coru mannu de “Tziu Lai” non ce dd’at fata a poderai e si nd’est andau a sa citia.
Passientzias mannas a sa familia e a chini dd’at bofiu beni.
Màuru Mura
Giobia, su primu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.quotidianocontribuenti.com/giornalisti-morto-antonello-lai-la-voce-degli-ultimi/
