Sighit sa relata de amori intru de Lionardu Pavoletti cun su Casteddu. Sa sociedadi cun su giogadori de atacu si funt postus de acordiu e duncas at a abarrai in s’Isula sarda finas a su trinta de làmpadas de su 2026, candu Pavoletti at lompiri trintot’annus de idadi.
Est nova chi pragit meda a is itfosus casteddaius poita ant arreconnotu in Pavoletti, a innanti de essiri unu giogadori balenti, de essiri un’omini de gabbale.
Lionardu Pavoletti, livornesu, est nasciu su bintises de Sant’Andria de su 1988 e prima de su Casteddu at bestiu is coloris de s’Armando Picchi de Livorno, su Viareggio, su Pavia, su Sassuolo, sa Juve Stabia, su Casale, sa Virtus Lanciano, su Varese, su Genoa e su Napoli. Est lompiu in Casteddu in s’istadi de su 2017 e at festau su primu gol cun sa magliegedda orrubia e asula in sa partida binta po 2-1 contras de su Benevento. Giai de tandu at fatu cumprendiri e chini fut, ca su gol fut stetiu decisivu po sa vitoria. Sempiri in su matessi campionau est de arregodai su gol fatu in Firenze contras de sa Fiorentina chi fut serbiu a fairi tres puntus de importu mannu po si sarvai de su calamentu in serie B.
S’annu a pustis fait dixiotu gol e giogat finas cun sa Natzionali italiana. Ancora spantosu in su campionau 2020-2021, candu at fatu gol in is partidas de prus importu: foras de domu contras de su Crotone, in sa vitoria in domu cun su Parma e ancora contras de su Benevento, foras de domu, aunia a su Casteddu serbiant comenti de s’aria is tres puntus.
Po immoi Lionardu Pavoletti at giogau 189 partidas cun su Casteddu fendu 49 gol. Sa prus famada, chi at fatu gosai de prus is tifosus, est cussa fata ocannu passau in Bari in s’urtimu minutu de giogu chi at arregalau a su Casteddu sa Serie A. Ma totus arregodant finas is gol de ocannu, massimamenti is dus fatus a su Frosinone e s’atru a su Sassuolo.
Màuru Mura
Cenarba, su catodixi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.transfermarkt.it/leonardo-pavoletti/profil/spieler/64793
