Prus de unu miliardu e otuxentus de sterlinas, chi in euros bolint nai prus de dus miliardus. Est cussu chi balit totu sa cosa chi tenit su rei de Inghilterra, Carrulu III. Is fortunas de su Rei dd’as at fatas a innantis de bessiri a su tronu e cussas tentas de sa mama, sa reina Elisabeta.
A cicai de fairi is contus est una cica portada a innantis de su cuotidianu ingresu The Guardian, chi fait imbucai in is calculus su chi balint is domus chi ant fatu storia, is prendas, is machinas de rapresentantzia e cuadrus, sculturas, colletzionis privadas de arti. Est a nai ca fendu beni is contus s’andat meda de prus a innantis de su dinari chi si creiat a intru de is buciacas de Carrulu. Si pensaiat ca totu is possedimentus de su Rei podiant balliri non prus de seixentus o setixentus milionis de sterlinas. Custa cica, invecias, at amostau ca aici no est e s’est lompius a una cifra spantosa de averas.
A ndi fairi pesai in artu su patrimoniu de su Rei, po The Guardian, chi ddu ponit in s’editzioni online, est massimamenti s’imunidadi fiscali garantia a su monarca in pissu de is prendas tentas de sa mama. Prendas chi, po su giornali, funt lompias in is manus de Carrulu chena pagai peruna tassa de sucessioni candu Elisebetta s’est morta, a norantases annus, s’otu de cabidanni de ocannu passau.
Is indicus de su Guardian erribant a una pariga de cidas, o pagu de prus, de sa incoronatzioni de re Carrullu e de sa reina Camilla, su ses de maju in sa cresia de Westminster. Est a nai puru ca donant fortza a totus is chi funt contras de sa monarchia, pensenduru, massimamenti a sa crisi economica manna chi seus patendu e de sa vida sempiri prus cara de totus is ingresus.
Buckingham Palace, a dogna manera, ponit calencuna duda in custus contus: “Non seus abituaus a chistionai de dinari, ma pensaus ca is contus chi eis fatu funt fartzus. Is prendas de su Rei depint abarrai privaus comenti cussus de dogna citadinu de su Regnu Uniu”.
Màuru Mura
Venerdì, su bintunu de arbili de su 2023
Foto: https://www.elle.com/it/showbiz/celebrities/a35823673/principe-carlo-inghilterra-re/
