Una vida intregada a su fubalu, sighendu sa passioni sua, de is Cosmos a sa Fiorentina: Joe Barone est mortu eris in Milanu, po mori de unu mali chi dd’at corpiu dominigu passada, a innantis de sa partida intru de sa Fiorentina cun s’Atalanta, in segus non giogada.
Su diretori de sa Fiorentina, chi oi iat airi lompiu is 58 annus, s’agataiat in s’aposentu de terapia intensiva de su spidali Santu Rafaeli de Milanu, ma giai de su cumentzu pariat postu mali meda. Est sa matessi Fiorentina chi, in dd’unu paperi, a fatu connosciri sa nova legia: “Cun dd’unu dolu mannu e tristura, sa Fiorentina oi perdit un’amigu chi at fatu meda, in is contus de acanta, e no at essi mai scaresciu”, si ligi intru de atru.
Barone s’est agatau inderetura a su costau de Rocco Commisso comenti custu at comporau sa Fiorentina de is Della Valle. Ma sa relata intru de is dus fut giai cumentzada tempus meda a innantis “In custus annus Barone m’at agiudau meda e immoi est giustu a si ddu arreconnosciri, duncas de oi at essi su diretori generali de sa Fiorentina”, aici iat fueddau Commisso in cussu tempus.
Nasciu in Pozzallo, in Sicilia, su 20 de martzu de su 1966, Barone est partiu in su 1974, paris a sa familia in is Stadus Unidus. Acabbau de studiai iat cumentzau a trabbagliai in banca, ma a pustis airi atobiau Rocco Commisso est diventau su numuru dus de sa sociedadi Mediacom e dapoi, in su 2017 su matessi numuru dus de is New York Cosmos. Barone cojau cun Camilla fut babbu de cuatru figlius e in su tempus est stetiu de averas s’omini de fidi de Commisso in totu e po totu, massimamenti in su mundu de su fubalu.
S’interru at essi in is Stadus Unidus, in su mentris chi sabudu, in Pozzallo, chi est in sa provincia de Ragusa, at essi fata una missa. Po ddu saludai, oi de is noi oras de mengianu a is noi oras de merì at essi obertu un’aposentu in su Viola Park.
Màuru Mura
Giobia, su bintunu de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/sport/calcio/2024/03/19/morto-il-dg-della-fiorentina-joe-barone_72339c36-03f0-4ecd-878c-2bc2916cfcbf.html
