Est mortu in su spidali de Goritzia Brunu Pizzul, bogi storica de su giornalismu sportivu italianu. Iat airi lompiu is otantaset’annus s’otu de martzu. Difati fut nasciu in Udine s’8 de martzu de su 1938. Pizzul at cumentzau in sa Rai in su 1969 e a intru de un’annu dd’iant donau sa partida de unu de trabbagliai: Juventus-Bologna, chi fut unu sparegiu de Coppa Italia. De is mondialis de su 1986 in Messico fut diventau sa bogi de principiu de is partidas de sa Natzionali italiana. E sa matessi scuadra dd’at acumpangiada po cincu bortas intru de is Mondialis de Fubalu. Chena scaresciri cuatru europeus. At lassau su chistonai in sa Rai cun is partidas in su mesi de austu de su 2002 cun Italia-Slovenia. Sa dì iant bintu is slovenus po 1-0.
In su mentris chi contaiat a sa manera sua is partidas, trabbagliaiat finas po Domenica Sprint e sa Domenica Sportiva. Una curiosidadi: no iat mai pigau sa patenti po ghiai is veturas e si moviat cun sa bicicreta.
No artziaiat mai sa bogi e si connosciat massimamenti po stili. In dd’una chistionada cun dd’unu giornali, de pagu, iat nau: “Is chi contant is partidas oi funt bravus de averas, ma chistionant tropu”. Pizzul si stagliaiat ca no aboginaiat, giai contendu sa partida e giai candu ndi depiat chistionai a sanguni fridu.
Ddi pragiat, a sa spantada, su giogu de sa bòcia e ddu iat fians giogau. A innantis in sa scuadra de sa cresa di Cormosn, sa Cormonese, a pustis in su Pro Goritzia, imbestentus librus e bòcia etotu. Est finas diventau giogadori professionista, candu in su 1958 ddu at comporau su Catania. Dapoi est andau a giogai in s’Ischia, in s’Udinese e in sa Torres. Ma, a dogna manera, po mori de unu genugu chi non ddu lassaiat in pagi, at smitiu. Si fut laureau in Leis e, a innantis de trabbagliai in sa Rai, iat fatu su professori de materias literarias in is scolas medias.
Màuru Mura
Mercuris, su cincu de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto:https://www.tgcom24.mediaset.it/televisione/giornalismo-in-lutto-morto-bruno-pizzul_94641316-202502k.shtml
