“Torru gratzias de coru a totus po is pregadorias po sa saludi mia. Deu bos acumpangiu de innoi. Chi Deus bosi prengiat su sentidu e su coru e sa Madonna bos alloghit. Gratzias de averas”.

Funt is fueddus registraus oi in dd’unu messagiu, chistionendu in spagnolu, de Paba Franciscu in s’aposentu de su spidali “Policlinico Gemelli”, aunia s’agatat de su catodixi de friargiu po sanai una promonita a is duas partis.

Bergoglio at nau ca est allirgu de is messagius de amori, in numuru mannu, chi dogna dì ddi lompint. E torrat gratzias po is pregadorias de sa genti de Deus. Su messagiu de Franciscu ddu ant fatu ascurtai a su cumentzu de sa preghiera de dogna dì de s’orrosariu po sa saludi de su Paba.

Is urtimas novas chi donant is dotoris de su spidali intru de sa saludi de Franciscu, narat: “Finas oi non at amostau perunu problema de sulai e no at tentu mancu caglientura. Ma, non po custu, is dotoris abarrant in is insorus chena fairi peruna previsioni. A dogna manera, sigomenti sa saludi de Paba Franciscu est sempiri sa matessi, su bulletinu benienti po donai novas at essi amostau e ligiu in sa dì de pusti cras, sabudu, s’otu de martzu”.

Jorge Mario Bergoglio, chi est su nomini po intreu de su Paba, est nasciu su 17 de Mesi de Idas de su 1936 de dus italianus lompius in Argentina de su Piemonti: Mariu, su babbu faiat su ragionieri po is ferrovias, in su mentris chi sa mama, Regina Sivori, si interessaiat a sa domu e a pesai is cincu figlius. De su 13 de martzu de su 2013 est bessiu in sa cadiru chi fut de Santu Perdu e aici est su de unu, po cantu pertocat is pabas, a essiri lompiu de s’America de basciu. Bergoglio fut giai arcipiscamu de Buenos Aires de su 1978 e sa personi sua fut connota meda, aici comenti meda fut s’amori de sa genti de sa diocesi sua po cust’omini sempiri facili de cumprendiri.

 

 

Màuru Mura

 

 

 

Giobia, su ses de martzu de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.repubblica.it/vaticano/2025/03/06/video/la_voce_di_papa_francesco_trasmessa_in_piazza_san_pietro_grazie_per_le_preghiere-424047104/