Casteddu-Udinese 1-2
In sa partida de oi, a pustis prangiu, su Casteddu podiat serrai sa chistioni de si sarvai de sa calada in Serie B. Bastaiat a binciri e a tenni sa spera chi s’Empoli non bincessit cras contras de sa Latzio. Invecias sa partida dun s’Udinese est andada perdia po 1-2 e de sa chistioni si nd’at a atorrai a fueddai sabudu chi benit in sa partida in Como. “Eus faddiu meda in s’urtimu passagiu de su palloni – narat s’allenadori Davidi Nicola – fustis inas gioghendu beni, dapoi no eus tentu crobba manna e eus ligiu mali calencuna situatzioni. Lastima manna, poita boliaus pigai sonumancu unu puntu e in campu eus amostau cussa gana, ma bolit nai ca depeus ancora trabbagliai. E ddu eus a torrai a fairi giai de lunis”.
Po su Casteddu est unu passu a palas, massimamenti cunfroma a sa partida de lunis passau in Verona. “Prefergiu a giogai in Casteddu invecias che a foras, poita aici teneus is tifosus a su costau”, narat sempiri Nicola. “Is piciocus funt stracus meda a s’acabbu e custu bolit nai ca in campu eus donau totu. A-i custa scuadra si podit nai ca mancat de lucididadi o ca fait totu coidendu, ma non chi non cichit de donai totu po fairi puntus cun calechisiat scuadra. S’Udinese est una scuadra tostada, lastima a no airi bintu”, torrat a nai s’allenadori casteddaiu.
Nicola etotu at torrau a ponni in campu, cuasi totu is giogadoris chi iant cumentzau in Verona. “Pavoletti teniat calncunu problema et est torrau a giogai Piccoli. Is atrus funt cussus chi tenint prus partidas in is cambas, calencunu no est in su tempus meglius e ddu depeus pigai po cussu chi nosi donat”, sempiri Nicola. Su matessi allenadori non c’at calau su gol chi at arregalau is tres puntus a is friulanus: “Depiaus donai prus crobba, dapoi apu fatu imbucai a Felici cun Coman po cicai de paregiai, ma aici no est andada: passientzia!”.
Màuru Mura
Sabudu, su tres de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=xKBMl02MZ0I
