Una festa de sa genti chi ce dda fait a ponni paris, de seculus, sa fidi in Efis cun su folklori. Genti a muntonis, fidelis, bividoris de sa citadi, ma finas strangius in numuru mannu, ant prenu, comenti in donnia su primu de Maju, is caminus de sa capitali sarda, in ocasioni de sa Festa de Sant’Efis, chi ocannu est lompia a sa bia de 369.
Sa statua de su martiri guerrieru at cumentzau su caminu bia Nora ingiriada de sa fidi e de s’amori de dognunu chi si ddue agataiat.
In deannti de sa genti chi preniat su logu che un’ou, si funt amostaus prus de duamila e otuxentus bestius in costumu sardu traditzionali, trintaduas trumas de cavalieris po, in totu, centusessanta dus cuaddus, cuatru trumas po cincuantases militzianus e cincu trumas de sonadoris cun is launeddas.
In prus finas dixiaseti tracas e setanta trumas de devotus a Sant’Efis chi caminaniant a pei scurtzu. Una festa manna chi ocannu at bofiu arregodai finas a Papa Franciscu, mortu su 21 de arbili passau. “Su Papa nos at onorau in du 2013 de sa bisita in Casteddu: sa borta de unu chi est lompiu in citadi at nau is matessis cosas chi de sempiri acumpangiant sa processioni de Sant’Efis: est a nai pagi e atentzioni manna po cussus chi sunfrint e po is urtimus de sa sociedadi”, at nau su sindigu casteddaiu Massimu Zedda. “Soi allirga meda de rapresentai totu is feminas e saludu, massimamenti, sa genti chi no est in pagi a dolumannnu po totu is guerras”, at nau, invecias s’Alter nos Martzia Cilloccu, sa femina de tres, in totu sa storia, tzerriada a rapresentai sa municipalidadi de Casteddu. E sa governadora Alissandra Todde: “A Sant’Efis ia a pediri non feti de castai sa comunidadi, ma finas de nos agiudai a torrai a agatai sa pagi chi in logus medas s’est perdia”.
A pustis chi est lompiu in Nora, su santu pusti cras at a torrai in sa matessi cresiedda de Stampace.
Màuru Mura
Cenarba, su dus de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://it.wikipedia.org/wiki/Sant%27Efisio
