“S’eredidadi lassada de sa Giunta Solinas est stetia tostada de seguru, ma in pissu de sa chistioni de sa sanidadi tocada a coidai ca sa passientzia de is sardus abbisongiat a dda castiai beni, poita dd’ant giai perdia in custus urtimus cinc’annus”. Massimu Zedda ddu narat in s’intervista chi at fatu cun Radiolina in sa trasmissioni “A tu per tu”, aunia at finas fueddau de progetus po Casteddu, energia rinnovabili e de politiga regionali e natzionali.
In pissu de sa sanidadi, chi dde tempus est unu de is problemas prus mannus de sa Sardigna, su sindigu de Casteddu at nau: “Abbisongiat a donai spustas a sa genti. Chi non si garantint coidendu is curas ant a cresiciri su dinari de ponni po sa filera sanitaria in su benienti. De sa sanidadi si depit chistionai de su prenimentu e non de su chi tocat a preniri, est a nai ca tocat a donai servitzius”. A pustis torrat gratzias a s’amministratzioni regionali “gratzias a sa cali funt andendu a innantis is trabbaglius de sa Domu de sa saludi in Sant’Elia”.
Candu a Zedda ddi benit pregontau comenti at agatau Casteddu a pustis de s’amministratzioni de Truzzu narat ca: “Sa citadi chi in su 2011 apu agatau, chi fut stetia guvernada de Delogu e Floris, non fut in custas cunditzionis”. Su sindigu at duncas chistionau de su problema de su traficu, de is multas a is localis de su noti e de su liamentu de veturas in su acabbu de cida. “Seus studiendu unu pianu po su traficu chi at agatai sa mesura candu eus a serrai is cantieris de trabbagliu obertus”.
De su benienti de su Campu Mannu, chi in Italia s’est amostendu cun certus de una parti e de s’atra Zedda narat: “S’impignu prus mannu de is partidus abarrat cussu de ponni paris is fortzas de su centrumanca. Ci seus trabbagliendu de su 2007, no est pagu cosa. Tocat a ponni paris totu cussus chi bolint agiudai a donai una vida meglius a sa genti”.
Màuru Mura
Giobia, su dexi de Santu Antine de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilgiornale.it/news/interni/cagliari-trionfa-campo-largo-massimo-zedda-eletto-sindaco-2332786.html
