“Berlusconi-Meloni? Est totu unu trucu chi fait parti de su giogu. Ant a fairi s’acordiu, tra calencuna dì ant a prandiri paris e su guvernu nd’at a benni a pigliu. De fatu deu creu chi non siant in gradu de guvernai, ma est giustu chi custu guvernu partat”.

Ddu at nau Mateu Renzi a Sky live in Firenze, pensenduru a cussu chi est sussediu cun s’eletzioni de La Russa in sa cadira prus arta de su Senau, aunia is fortzistas de Berluscoi no ant pigau parti a sa votatzioni e, massimamenti po cussa punta de billetu aunia su capu de Fortza Italia at scritu ca sa Meloni est una “Supponente, prepotente, arrogante”.

“Chi Berlusconi faiat cussu chi pensat non depiat intrai in su guvernu nou, invecias at a acabbai a binu e casu, poita est tropu forti sa gana de su poderi”.

Unu guvernu chi at a nasciri, duncas, ma non at a durai meda su meli durci, narat Renzi: “Finas a is Europeas de su 2024, in segus eus a biri. Chi sartant nosu seus prontus, a fairi opositzioni non bolit nai a pigai a fueddus malus s’aversariu, ma fraigai calencuna cosa po candu non totu at andai beni. Est diventada sa specialidadi mia in is urtimus annus, ddu eus a fairi finas cun sa Meloni chi ata a serbiri”.

Su “leader” de Italia Viva negat cun totu sa gana chi tenit in cropus ca is votus de su Terzo Polo siant andaus a La Russa: “Mancu po nudda. E sa dimostratzioni est in sa votatzioni po eligiri su Presidenti de sa Camera: su candidau nostu at pigau prus votus de cantu ndi teneus segurus. Tocat a castia beni in su Partidu Democratigu, poita sa candidada insoru, Guerra, at pigau prus pagus votus de cussus chi s’aspetatiat. La Russa at tentu 17 votus in prus, nosu seus in noi e no est una cosa possibili a fairi is fotocopias”.

E sighit: “Chi a capu de su guvernu ddu est ancora Draghi nosu ddu votaus, cun Meloni non guvernaus e no at a tenni sa fidi nosta, non ap’essi mai de sa parti sua”.

 

 

Màuru Mura

 

 

 

Martis, su 18 de Mesi de ladamini de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.agenzianova.com/news/renzi-litigio-nella-maggioranza-tutta-una-manfrina/