Casteddu cicat de diventai sempiri prus birdi. A pustis essiri lompia de duas in s’editzioni 2024, Casteddu torrat a calai in campu, custa borta cun s’agiudu de sa Citadi Metropolitana, e si ponit in giogu po essiri sa Capitali de su birdi po su 2025. Custu arreconoscimentu, pesau de sa Comissioni Europea tenit comenti de obietivu cussu de premiai is citadis europeas birdis cun prus de centumila abitantis.
Po promoviri sa pensada, finas a su binticincu de arbili esistit una consultatzioni public apo ndi boddiri progetus chi si funt fendu in totu su territoriu de sa Citadi Metropolitana in relata cun s’ambienti. Podint essiri presentaus, duncas, progetus chi funt giai nascius e atrus chi podint essiri fatus in tempus pagu.
“Su trinta de arbili serraus totu po presentai sa candidarua nosta – narat su numuru dus de su sindigu casteddaiu, e assessori a sa Pianificazione strategica, a su Sviluppo urbanistico e Verde pubblico Giorgi Angius -. In segus is tecnicus de European Green Capital Award ant a donai arrespusta in pissu de sa documentatzioni e ant a fairi connosciri is citadis chi ant a cuncurriri po binciri in sa finali de su mesi de Santu Aine in Tallin, chi est sa Capitali Birdi de ocannu. Casteddu partit de tesu, de su 2022 aunia at tentu unu arresurtau mannu e contaus de ddu migliorai ancora de prus, ponendu in conca su trabagliu de s’aministratzioni comunali cun is progetus de custus annus e de su benidori”.
Su mesi ch’intrat, in maju, at essi presentau de su Cumunu casteddaiu unu report in pissu de totu is progetus presentaus.
Su sindigu Paulu Truzzu chistionat de is arregionis de custa pensada: “Su birdi e s’ambienti funt de sempiri chistionis mannas de su programa nostu, non feti comenti Cumunu de Casteddu, ma fintzas de sa Citadi Metropolitana. Po nosu Casteddu, cun s’agiudu de totu is biddas acanta, tenit totu po podiri diventai sa Capitali de su birdi”.
Màuru Mura
Martis, su cuatru de arbili de su 2023
Foto: https://www.paesionline.it/italia/guida-cagliari
