Su Tribunali de sorvegliantzia de Firenze at cumandau is acapius in domu po Denis Verdini po seti mesis po arregionis de saludi. Ddu at fatu sciri s’abogau Marcu Rocchi chi at nau ca “Verdini est de pagu lompiu in domu”.
A su cumentzu, Verdini, s’agataiat in su presoni de Sollicciano, ma, in segus, po mori de sa saludi fut stetiu portau in su presoni de Don Bosco, in Pisa aunia si ddue agatat unu centru clinicu. Su matessi abogau chi ddu difendit iat pediu de ddu fairi bessiri de presoni poita sa saludi de Verdini fut posta mali e non podiat passai atru tempus in cella. S’atra dì, in dd’una udientzia in su tribunali aunia s’est amostada sa relata de su professori Carrulu Rostagno, dotori postu in mesu de su matessi tribunali, aunia si narat ca Denis Verdini tenit prus maladias chi est dificili de curai beni in dd’unu presoni. Su propriu at nau su dotori de is corus, professori Pieruluisu Stefano, postu in mesu invecias de sa difesa.
De cunseguentzia su tribunali at decidiu po fairi passai seti mesis in domu a su parlamentari beciu de Fortza Italia, chi immoi est a intru de sa villa sua de Pian de’ Giullari, in sa collina in pissu de Firenze. Denis Verdini, chi tenit setantatres annus, depit pagai in cuindixi annus e dexi mesis sa curpa de tres cundennas po “bancarota”. Giai in su mesi de gennargiu de su 2021 iat tentu is acapius in domu, sempiri po arregionis de saludi, po mori de su Covid chi impestaiat intru de is presoneris e is secundinus de su presoni de Rebibbia aunia s’agataiat tandu. Sa matessi decisioni in su mesi de orgiolas de su 2021 po mori, custa borta, de s’idadi chi fut, tandu, lompia a setant’annus.
Intru de custu, in su mesi de frairgiu de ocannu, Denis Verdini est stetiu impresonau un’atra borta in cella ca non iat sighiu is cumandus de su tribunali: difatis teniat feti su cumandu de andai a si curai is dentis e invacias si fut amostau in calencunu ristoranti romanu in oras chi non ddi fut permitiu.
Màuru Mura
Mercuris, su bintinoi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://corrierefiorentino.corriere.it/notizie/24_giugno_01/denis-verdini-e-uscito-dal-carcere-per-motivi-di-salute-va-ai-domiciliari-per-7-mesi-a4b22f0e-e1b3-43b3-80ab-a7fb270f2xlk.shtml
