Is famiglias de is mortus de su Moby Prince, eris, funt stetius ascurtaus de sa comissioni parlamentari de indagu de cantu est sussediu su 10 de arbili de su 1991. S’amargura de is socius est sempiri sa matessi: “Boleus chi lompant arrespustas a is pregutas. Po s’ora non ci funt”. Sa comissioni de tres de indagu est ghiada de su deputau sardu de Fortza Italia Perdu Pittalis. Luchinu Chessa cun Nigola Rosetti, presidentis de su sociu 10 arbili e de su sociu 140, torrant in Comissioni de indagu po pediri giustissia.
A nomini de is familiaris de is centucoranta mortus pedint de connosciri, una borta po totus, sa beridadi de comenti furint andadas is cosas cussa dì. Sa beridadi passat in pissu de preguntas ancora obertas e de sa seguresa chi si fut depiu imboddiai calencuna cosa.
Chessa, figliu de su cumandanti de su Moby, torrat a partisi de is agiudus. “Poita funt stetius stesiaus bia sa petroliera Agip Abruzzo e nemus at pensau a sa Moby Prince? Poita est passada un’ora e mesu a innantis de s’identificatizoni de su traghetu? Poita su cumandu de sa Capitaneria no at sarvau is personis ancora bias, e non mortas a intru de mesoredda, comenti narat s’indagu de su processu de unu?” Po is socius custa est s’urtima ocasioni po preniri in totu su trabagliu fatu de su Parlamentu. Po Chessa sa prima chistioni de acrariri est “poita s’est fueddau inderetura de sbagliu de s’omini e poita non si funt acrarias is trabaglius de sa Agip Abruzzo in su mentris chi s’agataiat in is orus de Livorno”.
Est a nai ca est ancora de acrariri meda s’atumbu de sa Moby Prince cun sa petroliera. Po cantu narant Chessa e Rosetti abarrat su misteriu.
In su mesi de friargiu de ocannu passau, is socius iant pediu a bogi arta a su presidenti de sa Camera Larentu Fontana de torrai a oberri is trabaglius cun dd’una comissioni de tres. Immoi pancat s’urtimu passu de custu caminu: “Non boleus lassai custa bataglia – narant is presidentis de is socius – a is figlius e nebodis nostrus”.
Màuru Mura
Martis, su bintotu de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Disastro_del_Moby_Prince
