Su mundu de su fubalu italianu, massimamenti cussu casteddaiu, prangit sa morti de Sergiu “Bobo” Gori, unu de is giogadoris chi in su 1970 at agiudau meda su Casteddu a binciri cussu scudetu famau. Giogaiat un su numuru noi in sa schina e fintzas gratzias a is giogadas suas Riva est diventau cussu chi totu connosceus. Est a nai ca su giogu de “Bobo” s’acapiaiat in manera giusta a su giogu de Gigi Riva.

Gori fut nasciu in Milano su binticuatru de friargiu de su 1946, duncas de tempus pagu iat lompiu is setantaset’annus. In prus de cussu casteddaiu a bintu de giogadori atrus tres scudetus, dus cun s’Inter e unu cun sa Juventus. Giogadoris pagus ce dd’ant fata binciri cuatru scudetus cun tres scuadras diversas. Cun Gori ce dd’ant fata feti atrus cincu: Giuanni Ferrari, Filipu Cavalli, Perdu Fanna, Ardu Serena e Atiliu Lombardi.

Cun sa maglia de s’Inter in pissu, in is annus sessanta de su seculu passau, at fintzas bintu una Copa de is Campionis e duas Copas Intercontinentalis, e cun sa Juventus, in su 1977 una Copa Uefa.

At giogau fintzas po su Vicenza, su Verona e su Sant’Angelo e at fatu parti de is giogadoris partius po su Messico in su 1970 po si giogai is Mondialis de fubalu, aunia s’Italia fut lompia feti a is palas de su Brasile de Pelè.

In su Casteddu est calau in campu po centusessantases partidas e at fatu trintatres gol e at tentu s’orrubiu-asulu in pissu de su 1969 a su 1975. In s’urtimu annu chi est abarrau in Casteddu, a pustis chi Riva si fut strupiau, est cussu chi at fatu prus gol.

Giogadori de atrus tempus, unu de is prus mannus chieus bidu in Sardigna.

Passientzias mannas

 

 

Màuru Mura

 

 

Mercuris, su 5 de arbili de su 2023

 

 

Foto:https://www.repubblica.it/sport/calcio/2023/04/05/news/morto_sergio_gori_cagliari-395047100/