“Solidariedadi a cussus chi ant tentu fueddus legius, prenus de odiu, de parti de is no-vax. A si dda pigai cun chini trabagliat po binciri sa pesta est de vilis”.

Cumentzat aici, cun custus fueddus, su primu atobiu cun is giornalistas de Màriu Draghi e is ministrus Bianchi e Speranza, a pustis is ferias de su mesi de austu. Draghi at cumbidau totus a si vacinai: “Tocat a ddu fairi po nosu e totu e po is atrus puru. Chi is cosas sighint a andai comenti funt andendu, po s’acabu de cabudanni eus a tenni s’80% de is italianus vacinaus”. Castiat sa tassa mesu prena su presidenti de su Consigliu: “Seus cuntentus de is piciocus chi si funt vacinendu e de totu s’atra genti. Custu nosi permitit de torrai a partiri cun prus fidi po su benidori. Contaus de tenni sa scola sempiri in presentzia”. Est de arregodai ca su 91,5% de is professoris s’est vacinada sonumancu una borta.

“Su green pass – at sighiu a nai – mi parit ca est andendu beni. In is mesis passaus non si podit nai ca seus abarraus cun is manus in manus. Seus pensendu de allonghiai su tempus de su su green pass, depeus galu decidiri, ma s’orruga de sighiri est custa. Po mei iat essi obrigu a si vacinai”.

De su contu de su vacinu de tres nd’at chistionau, invecias, su ministru de sa saludi Robertu Speranza: “Eus a partiri a s’acabu de custu mesi cun sa genti chi tenit prus problemas de saludi. In pissu de s’obrigu possu nai ca po imoi est feti po chini trabagliat cun sa sanidadi e a obrigai a totus est una chistioni chi si depit biri in Parlamentu”.

Sa scola est de importu mannu po su Guvernu e su ministru a s’Istrutzioni Patritziu Bianchi at umperau custus fueddus: “In is classis aunia funt totu vacinaus is piciocus e is piciocas podint intrai chena mascherina e torrai a erriri comenti si faiat a innantis. In is atras classis is regulas abarrant cussas de s’Ats: mascherina e stesiamentu”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.tg24.info/ultimora-mario-draghi-obbligo-vaccinale-green-pass-scuola-e-trasporti/