Funt custas is dis de s’acabbada de sa campagna eletorali po su presidenti de sa Regioni nou. Lunis eus a sciri dogna cosa. Ma immoi sa chistioni si fait tostada ca totus funt cichendu de cunvinciri dognunu de essiri su meglius po sa Sardigna.
Est prenu de averas totu su programa de custas dis. Custu merì Alisandra Todde, candidada de su campu mannu s’at a agatai in Carbonia e in Casteddu cun sa segretaria de su Partidu democratigu Elly Schlein. E giai at decidiu de serrai sa filera de chistonadas, chi s’at fatu in custus mesis, in Casteddu ma chena perunu lompiu de s’Italia, “poita, at spiegau sa Todde, disigliaus acabbai intru de sa genti nosta cun is bividoris de custa terra”.
Sempiri oi Arrenatu Soru, candidau de sa Coalitzioni Sarda, at a lompiri in su Tiatru Garau de Aristanis.
Cras, invecias, a is cuatru de a pusti prangiu, in sa Fiera de Casteddu, at a tocai a Paulu Truzzu, candidau de su centrudrestra, chi at a bessiri in pissu de palcu paris a is tres capus natzionalis de sa coalitzioni de is Fradis de s’Italia, Lega e Fortza Italia: sa presidenti de su Guvernu Giorgia Meloni, Mateu Salvini e Antoni Tajani.
Lucia Chessa, infinis, candidada de Sardigna R-Esiste, at essi oi in Tortolì e pusti cras, 22 de frairgiu, serrat in Tatari.
Custas funt is dis de is impromissas e dognunu de is candidaus at a chistionai de sa Sardigna de is bisus. Sussedit sempiri, ma funt paghisssimus cussus chi, una bia setzius in cadira, ant a mantenni. Est cussu chi pensat sa genti, massimamenti cussa chi no andat prus a votai ca s’est orroscia de ascurtai feti politigus chi impromitit e dapoi si ndi scarescit. Difatis in calechisiat torrada eletorali est sempiri prus paga sa genti chi votat. Finas custa bia at essi de aici? Tocat a aspetai giustu una pariga de dis e ddu eus a cumprendiri.
Màuru Mura
Martis, su binti de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.comune.oristano.it/it/index.html
