“Robo, beni a innoi!”. Cun custus fueddus at pigau s’atentzioni de su presidenti slovacu Robert Fico, a innanti de ddu sparai e a ddu ponni in perigulu de vida. Ancora s’aspetat s’uficialidadi, ma is giornalis e is televisionis de sa Slovacchia ant fatu su nomini de s’omini chi at umperau s’arma: est Juraj Cintula de setantun’annus cun arreiginis de Levice, in su basciu de sa Natzioni e scritori de poesias.
In su tempus passau Cintula est stetiu finas unu ativista contras de sa violentzia e trabagliendu po is servitzius de seguresa una borta unu imbriagu ddu at lantiau in dd’unu centru cumerciali. Po mori de cussu trabagliu – faint connosciri ancora is “media”, podiat portai s’arma cun sa cali at provau a bociri su primu ministru Gico.
Po cussu chi si scit Cintula nd’at pesau su Club letererariu Duha e, castiendu sa pagina Facebook, est autori de prus de un’arregorta de poesias e de unu romanzu. Su giassu Dennik N contat ca Cintula otu annus a immoi fut arregogliendu firmas po ndi pesai unu partidu politigu “Hnutie proti nasiliu”, chi bolit nai “Movimentu contras de sa violentzia”.
“Sa violentzia, iat scritu tandu, est una reatzioni de sa genti comenti de manera de no essiri cuntentus po comenti andant is cosas. Cicaus de no essiri cuntentus ma mai violentus”.
Un atru giassu slovacu, aktuality.sk, est arrennesciu a chistionai cun su figliu de Cintula, chi at fatu sciri ca non si dd’aspetaiat e ca su babbu teniat sa pistola in manera legali. “Non tengiu peruna pensada de cussu chi boliat fairi babbu e poita est sussediu”, at nau, acingendu dapoi ca su babbu no iat mai chistionau de cosas aici. “De seguru no at votau po Fico, custu est totu cussu chi possu nau in pissu de sa chistioni”. Su figliu at finas nau ca no est beridadi chi stu babbu fut suta curas de su psichiatra.
Màuru Mura
Giobia, su seigi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.adnkronos.com/internazionale/esteri/robert-fico-attentato-slovacchia-linea-politica_1NjNiQ6mKdC8QAyHS3Pgcg
