Su presidenti beciu de is Stadus Unidus at denuntziau Hillary Clinton, su Comitau natzionali de is democratigus e atras bintises personis e sotzius po “airi tramau cun is fueddus, e chena peruna prova, is eletzionis de su 2016, nendu de is acapius intru de Trump cun su presidenti de sa Russia Vadimir Putin”.

Ddu fait sciri sa televisioni americana, sa Cnn.

Intru de custus bintises si ddue agatant su diretori beciu de sa Fbi, James Comey, e atrus funtzionarius de sa matessi, su bugoni britannicu Christopher Steele e atra genti chi donaiat agiudu a sa Clinton.

Est una denuntzia de centu e otu paginas portadas in tribunali, e in su paperi Trump si dda pigat, massimamenti cun is nemigus poligus chi de sempiri dd’ant fatu sa gherra. Incurpat is democratigus e atrus funtzionarius de su guvernu de cogliunus comenti cussa de imbroglius informaticus e cumplotus. At pediu prus de binticuatru milionis de dollarus poi s dannus chi at tentu.

Trump, in pagus fueddus, narat ca Hillary Clinton cun funtzionarius de artu gradu ant pagau abogaus e cicadoris po imbentai is acapius sus cun sa Russia e, in segus, “ant donau cussas faulas a is giornalis, televisionis e a su guvernu de is Stadus Unidus, in s aspera de ddu ponni in lugi mala po binciri is eletzionis de su 2016”.

John Podesta, su capu de su comitau eletorali de Clinton in su 2016, est unu de is bintises deununtziaus de Trump, at umperau pagus fueddus in Twitter, e cun spassiu at nau ca Trump podit lamai comenti testimongiu Putin etotu.

Ma ci bolit meda, poi s politigus, a tenni arrespetu de is votus de is citadinus? In donnia chi calencunu perdit sa cuntierra si dda pigat cun is atrus, incurpendu de cogliunamentus, e non pensenduru chi, invecias, no at poderau impromintzias e trabagliau mali. Fut sussediu in Italia puru, candu Berlusconi iat perdiu cun Prodi: totus chistionant ca tocat a fairi cussu chi decidit sa genti, e, in segus, si dda pigant cun is imbroglius.

Lastima manna ca non eus a biri unu mundu mudau, ma sa spera est chi is figlius nostus ddu cambint.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.tio.ch/dal-mondo/politica/1573518/trump-denuncia-hillary-clinton