“Seus pensendudenci. Cussu chi teniaus in conca, est a nai a tenni s’agiudu de su guvernu italianu, non est serbiu. Immoi seus pensendu a calencun’atru caminu de sighiri. Forsis su Presidenti de sa Republica Sergiu Mattarella est s’urtima possibilidadi chi teneus”. Ddu narat Robertu Salis, su babbu de Ilaria, sa maista de arreiginis sardas, impresonada in Budapest de cuasi un’annu a cust’ala cun sa curpa, po is giugis ungheresus, de airi assartau, in dd’una manifestada, genti de sa drestra prus funduda. Totu custu Robertu Salis ddu narat in dd’una intervista a su giornali torinesu La Stampa, e aciungit ca, a pustis, is atobius de sa cida passada cun is ministrus Nordio e Tajani est “foras de conca po s’inchietu”.
“Un atobiu de ndi fairi calai is brassus cun ambos. Nos ant lassau a sa sola in totu. Figlia mia Ilaria erriscat de abarrai galu po tempus meda in cussu presoni de Budapest – sighit a contai –. Eus a torrai a biri Ilaria in cadenas in tribunali, no est acabbada cun s’urtima bia. Orroba de macus”.
In Roma, Robertu Salis cun s’abogau, funt lompius po pediri a is ministrus “dus paperis po agiudai cussu chi iau pediu a is ungheresus, est a nai s’acapiu in domu. Cussus dus paperis, cun su nomini de is dus ministrus depiant essiri una seguresa po su guvernu de s’Ungheria. Ma non ant fatu nudda – contat ancora su babbu de Ilaria –. Nos ant nau ca non podiant fairi cosas de aici e ca, chi nde chi no totus is italianus chi s’agatant in presonis strangias, iant airi fatu su matessi”.
Sa relata de amigantzia strinta intru de Giorgia Meloni cun Orban, po Salis, non podit agiudai in custa chistioni. “Nou, deu non creu a custas cosas. Pensu invecias ca s’Italia non tenit manera, comenti depiat essiri, po chistionis aici – acabbat de nai -. E ddu pensu in totu, difatis creu chi mancu cun dd’unu guvernu de atru colori is cosas po Ilaria iant essi mudadas”.
Màuru Mura
Giobia, s’otu de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilfattoquotidiano.it/2024/02/05/caso-ilaria-salis-padre-roberto-lasciati-soli-governo-solo-no/7434543/
