Unu discienti de leis de 18 annus, in sa regioni de is Urali in Russia, intrat in s’Universidadi de Perm e cumentzat a fairi fogu cun d’una pistola, bocendu, po cussu chi narat s’agentzia Rass, sonumancu ses personis e lantiendu atras binticuatru. In is primas oras pariant otu is mortus ma sa politzia at nau ca no est beridadi. S’agatat unu videu puru aunia si bit s’intrada in s’universidadi de unu giovunu, chi iat a parri unu piciocu de 18 annus, Timor Bermansurov, cun d’una pistola in manus, de cussas facili meda de agatai. Su piciocu no est mortu, comenti si pensaiat a su cumentzu, ma s’agatat in su spidali.

Professoris e discientis si funt serraus a crai in is aposentus de s’universidadi e in atrus videus, amostaus de is media de su logu, si bint piciocus chi fuint fuliendudenci de is fentanas.

Benint amostadas finas fotografias de Bermansurov, cun sa faci imboddiada e cun armas in manus, pigadas de su social russu Vkontake: “Non mi possu biri, ma bociu e strupiu totu cussus chi si ponint in su caminu miu”, iat scritu su piciocheddu, nendu puru ca no fait parti de peruna truma de terroristas.

Is sparadorgius funt diventendu sempiri de prus, in is urtimus annus in sa Russia. Su presidenti Vladimir Putin, in su tempus passau, iat nau ca est totu cosa chi lompit de is Stadus Unidus e ca est curpa de sa globalizatzioni.

De arregodai, sempiri in Russia, s’11 de maju passau, ca unu giovunu de 19 annus, in Kazan, iat cumentzau a sparai in sa scola aunia iat studiau, bocendu noi personis. Su bocidori, acapiau, teniat su permissu de tenni sa pistola. In su mesi de Santu Aine de tres annus a oi, un’atru piciocu iat bociu, in sa scola sua de Kerch in Crimea, 19 personis a innantis de si bociri.

At a sighiri calencunì’atru? Prus seguresa, prus cultura e prus trabagliu, forsis est custa sa megina de fairi ingurtiri a is giovunus.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://video.corriere.it/esteri/siberia-sparatoria-all-universita-perm-video-dell-uomo-armato/703033f6-19e7-11ec-bad4-fdee4b3553ca