At a stupai de is Stadus Unidus totu cussus chi non funt in regula, c’at a stupai su “ius soli” e at a donai sa gratzia a totu cussus chi funt andaus in Capitol Hill.
Donald Trump partit a manera lestra e, in sa prima intervista de candu est torrau a diventai presidenti in su cumentzu de su mesi passau, lassat cumprendiri ca, massimamenti immoi at essi fogu e pampa, a intru de su Stadu, ma finas foras. Su Presidenti at inderetura postu in craru cun s’orrestu de is alleaus ca is Stadus Unidus funt prontus a nci bessiri de sa Nato “chi non si cunsiderant in sa giusta manera”. Un’amelessu chi iat giai fatu sa borta de unu chi fut presidenti e torrau a nai a innantis de sa torrada eletorali ma chi, a unu mesi chi est in carriga, e cun su dolu de guerras in Europa e in su Orienti de Mesu, fait a timiri is atrus stadus de s’Alleantzia.
“Depint pagai is contus insoru”, funt is fueddus de Donald Trumpa chi de annus medas incurpat is Stadus Europeus de non ponni dinari bastanti po is armas e de aprofitai de su paracu americanu, massimamenti in is urtimus dus annus, est a nai de candu sa Russia est imbucada in Ucraina. Finas in custa chistioni Trump abarrat frimu in cussu chi iat impromintiu a innantis de sa torrada eletorali e avertit ca unu segamentu a is agiudus a Kiev est probabili meda.
S’intervista cun “Nbc news” est stetia registrada cenarba passada, duncas a innantit de s’atobiu in Parigi cun Volodymyr Zelensky. De sa fueddada in s’Eliseo, acabbada cun dd’una strinta de manus intru de is dus a suta sa mirada de Emmanuel Macron, est beniu a campu ca Zelensky iat a bolli “s’acabbu de sa guerra inderetura” e su cumentzu de “mesas de pagi” po agatai un’acordiu, sonumancu po cussu chi narat su matessi Trump.
Una “pagi giusta e chi durit”, in is fueddus de su presidenti de Kiev, chi at torrau a nai ca is Stadus amigus depint agiudai.
Màuru Mura
Martis, su dexi de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ilfattoquotidiano.it/2024/12/07/parigi-trilaterale-a-sorpresa-tra-macron-trump-e-zelensky-il-tycoon-il-mondo-sta-impazzendo/7795749/
