Opositzoni e dotoris, ma finas una parti de Fortza Italia, contras s’annullu de is contraventzionis de cent’eurus, comenti narat su “Milleproroghe”, po cussus chi no ant fatu su vacinu intru de sa pesta de su Covid de una pariga de annus a cust’ala.
“No est de seguru una bella cosa e ponit problemas de oguagliantzia”, narat, cun craresa, su presidenti de sa Federatzoni natzionali de s’ordini de is dotoris e de is dentistas, Filipu Anelli, po cantu pertocada sa mesura. “Sa chistioni – torrat a nai – est acapiada a su fatu chi tirendudendi is multas a chini non s’est vacinau, benit a pigliu una cosa no oguali po cussa genti chi invecias is multas ddas ant pagadas. In su miniscimentu, est craru ca in cuss’ora, intru de sa pesta, s’obietivu fut cussu de s’obrigu de su vacinu po cicai de protegiri sa saludi de totu sa popolatzioni”.
Oi, narat ancora Anelli, “a pustis dus annus, sa contraventzioni perdit de significu, ma si ndi pesat unu problema mannu de oguagliantzia”. Po is opositzionis est invecias una “gratzia”, ancora prus manna in dd’una ora in sa cali sa sanidadi est in crisi o ancora de una “bregungia” o de unu “messagiu de orrovina”.
“Est una decisioni legia meda. Su guvernu fait s’ogu a chini andat contras is regulas”, narat sa segretaria de su Partidu Democratigu Elly Schlein. E finas Maria Elena Boschi, de Italia Viva, ndi pesat sa bogi: “Est un’ofesa manna po sa genti chi trabbagliat in sa sanidadi”.
Ma po custu decretu finas Fortza Italia ndi pesat calencuna duda. Sa numuru dus in su Senau, Licia Ronzulli, no umperat mesus fueddus: “Giai fut sbagliau a fairi pagai ancora prus adduru, ma a ndi tirai is multas est una cosa chi non podit essiri e bolit nai de si ndi scaresciri cussu chi est sussediu cun sa pesta de su Covid in Italia. Cussa de chini no at fatu su vacinu non fut una bataglia de libbertadi e sa spera est chi su Guvernu torrit a palas de custa pensada”.

 

 

Màuru Mura

 

Mercuris, s’undixi de mesi de Idas de su 2024

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

Foto: https://tg24.sky.it/politica/2024/12/10/multe-no-vax-annullate