Su mundu de su fubalu eris totu arriolau e po un’origedda sonumanu tremendu che una canna. Edoardu Bove, giogadori de sa Fiorentina orruit a sa sola in campu, a pustis de unu cuartu de ora chi si fut gioghendu Fiorentina-Inter. Inderetura sucurriu de is dotoris e carrigau in ambulanza. Sa cursa bia su spidali, is giogadoris in lambrigas. Totu imaginis chi fait a timiru su peus.

Depiat essiri festa manna a su stadiu Franchi de Firenze, aunia s’atobiaiaiant duas scuadras chi funt fendu beni meda in campionau, ca s’agataiant a unu puntu feti de su Napoli chi cumandat sa classifica. Invecias, in su giru de tempus pagu s’arriolu dda fait de meri e in is caras de is protagonistas si ddue amostant lambrigas.

Sa partida fut cumentzada de dixiaseti minutus e s’arbitru fut controllendu chi su gol fatu de Lautaro Martinez fut bonu. Su matessi arbitru chistionaiat cun s’allenadori de sa Fiorentina Arrafiaeli Palladino e is interistas funt a morrungius. In su fratempus Bove s’acapiat is crapitas, fait calencunu passu, si bit ca no istat beni poita andat de una parti a s’atra e orruit in s’erba, a su costau de Calhanoglu e Dumfries de s’Inter chi funt is primus a cumprendiri cussu chi fut sussedendu, comenti unu sacu de patata. Setziu in sa tribuna si ddue agataiat finas su babbu de su giogadori, Giuanni. Su primu a cicai de agiudai su cumpangiu est stetiu Danilu Cataldi, chi ddi ponit una manu in buca po ddi frimai sa limba e ddi permitiri de sulai. Cun Cataldi finas s’atru cumpangiu Robin Gosens.

Su capitanu de sa Fiorentina Ranieri discutit cun animu cun dd’unu trabbagliodori de s’ambulanza poita non imbucat in campu e finas Di Marco cicat de allestrai s’agiudu. Passant cuatru minutus intru de su dolu de Bove e sa cursa a su spidali de Careggi. Cuatru minutus longus meda, is caras de is giogadoris e de sa genti chi castiaiat sa partida funt arriolaus meda. E candu s’ambulanza lassat su stadiu partit una batidura de manus, in su mentris chi is scuadras lassant su campu. A pustis pagu sa nova ca sa partida acabbat aici e s’at a torrai a giogai.

 

 

 

Màuru Mura

 

 

 

Lunis, su dus de mesi de Idas de su 2024

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.adnkronos.com/sport/bove-malore-fiorentina-inter-oggi_1TCFeGfJQceuZSQkk33DwN