Dì niedda, cussa de eris, po cantu pertocat sa gherra contras is fogus in Sardigna. S’Isula est cun sa pampa tenendu de sa parti de pissu a-i cussa de giossu e is Canadair, is elicoterus de sa Regioni e de s’Aeronautica funt intervennius in otu fogus, de is bintunu chi ant abrugiau etarus a centinaias. Est a nai ca massimamenti at pigau fogu sa fustigaglia, ma finas zonas de padentis.
De sa centrali operativa de s’orruga de Biasi faint sciri ca dus chi funt dirigendu is scuadras po ndi morri su fogu si funt intendius mali, ma de cantu si cumprendit non funt postus mali po nudda.
Unu de is fogus prus legius in Bosa, in su logu de Monte Alvu. Po nde ddu morri funt lompius, cun sa Statzioni de sa forestaili de Bosa a cumandai is operatzionis, s’elicoteru partiu de sa basi de Santa Maria in Bosa etotu e s’elicoteru “SuperPuma” lompiu de sa base de Fnos. Po cicai de ddis donai agiudu in terra si ddue agataiant duas scuadras de s’Agentzia Foresta de is cantieris de Bosa e Tresnuraghes cun dd’una scuadra de barracellus de Bosa, totu est acabbau biora de is duas de a pustis prangiu.
In Isili su fogu est, invecias, partiu in logu “Letteioxi”, e po nde ddu morri, cun sa Statzioni de sa Forestali de Isili a cumandai is operatzionis, funt lompiu dus elicoteru de is basis de Sorgono e Fenosu cun dus canadair lompius de s’aeroportu de Terranoa. De terra ant agiudau cuatru scuadras de is cantieri de Biddanoa de Tulu SaOrta, Isili-Monte Simudis, Nuradda Corte sa Tella, Seulu Tacu Sui cun s’agiudu finas de una scuadra de volontarius de su sotziu Protetzioni Civili Sarcidano e una scuadra de is vigilis de su fogu de Mandas.
Atrus fogus ant picigau in Carbonia, Sant’Antiogu, Decimoputzu, Biddasorris, Nugoro, Lodè e Bonorva.
Su calori no agiudat a sanai sa conca de chini fait abrugiai sa terra nosta.
Màuru Mura
Lunis, su bintinoi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.avvenire.it/attualita/pagine/incendi-il-modello-dimenticato-che-funzionava-terzo-settoreo:
