Cuatru personis, dus mascus e duas feminas, de prus o mancu corant’annus, andant a papai in s’agriturismo Vultaggio, chi s’agatat in sa fratzioni de Guardato, chi apartenit a su cumunu de Misiliscemi in sa provincia de Trapani. Bint ca su camerieri est unu nieddu cun is arreiginis de su Camerun e pedint de ddu mudai. Non ddis andat beni po su colori de sa peddi.

Candu Giusepu Vultaggio, meri de s’agriturismo, ddu benit a sciri at inderetura bofiu denunciai cussu chi est sussediu, nendu ca est unu contu “chi nos at lassaus chena fueddus e intristau meda”. “Non ce ddus apu stupaus feti po non tenni problemas in s’aposentu aunia s’agataiat atra genti – narat – ma, in a pustis apu decidiu de pigai una positzioni crara chena perunu dringhili e apu scritu calencuna cosa in dd’unu post. Ddu depia a mimi etotu e massimamenti a Amza, chi trabagliat cun nosu de tres annus e ddu fait in manera manna: non si chesciat mai, est balenti e sempiri garbau cun totus”.

“Boleus de averas crariri e nai – at scritu su meri de s’agriturismo in dd’unu post acumpangiau de una fotografia cun su camerieri – ca de nosu s’acoglientzia e su amesturu funt una manera de pensai e de biviri. E chi intru de sa genti chi benit a papai s’agatat calencunu chi non tenit prageri de biri Amza in s’aposentu, o finas de calencun’atru serbidori po arregionis chi non c’intrant nudda cun sa professionalidadi est meglius chi non bengiant, potia non mudaus camerieris e nemus atrus ddus ant a serbiri”.

Giusepu Vultaggio est connotu meda in Misiliscemi, finas in is ambientis de su volontariau et est abarrau cuntentu meda de sa citadi chi at arrespustu in manera ancora prus crara a is fueddus sus: “Eus tentu prus de duamila cuntatus e prus o mancu cincuxentus fueddus de solidariedadi. M’allirgu de custu poita bolit nai ca contus aici non sussedint in donnia”.

 

 

 

Màuru Mura

 

 

 

Sabudu, su bintitres de martzu de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ansa.it/canale_saluteebenessere/notizie/sanita/2018/09/21/-medici-contro-razzismo-lanciano-campagna-nelle-citta-_7847f3ff-e064-4dc1-ae83-66508cc0d508.html