“A mimi de Beppe Grillo non importat nudda. Tocat a fueddai de chistionis, de territorius, de cussu chi bolit nai a guvernai e cicai de ponni in peis una truma de dirigentis nous. Grillo arregodat cussus personagius chi funt in is cartonis animaus chi candu bincint sartant de s’allirghia e festant in su mentris chi, invecias, candu perdint aboginant ca totus dda tentint cun issu e stampant sa bocia po non fairi giogai a nemus”.
Aici sa presidenti de sa Regioni Sardigna Alissandra Todde, in dd’una intervista a su “Quotidiano Nazionale”, est torrada a fueddai de su caminu nou de is Steddaus e de s’atobiu de totu sa genti de is Cincu Steddas chi, in is dis passadas, ant donau incarrigu e fidi a Giusepu Conte invecias de dda donai a Beppe Grillo, chi de is Steddaus, est finas a nai, est stetiu unu de is dus chi nde ddus at pesaus, paris a Casaleggio.
Po sa Guvernadora de sa Sardigna, oi su M5 est “sempiri prus in vida, comenti de mai – aciungit – depeus votai po mudai totu e torrai a partiri, in manera crara e po sempiri, cun custu caminu nou chi eus decidiu. Nosi lassaus a is palas totu is contus chi funt sussedius finas a immoi e torraus a fraigai totu paris sa domu nosta”.
Po cantu pertocat is alleantzias cun is atrus partidus, Todde narat craramenti ca “s’agatat una parti progressista chi est sa sola cosa possibili cunfroma a sa dresta, ma tocat a dda fraigai beni meda. E nosu, est a nai, boleus trabbagliai in custu caminu, tenendu contu, a dogna manera, de totu is diferentzias chi teneus, ma cichendu un’acordiu. Ma non seus e non eus a essiri mai matigeddas de su Partidu Democratigu”.
Todde at finas chistionau de sa relata sua cun sa Presidenti de su Guvernu Giorgia Meloni: “Tocat a dda cumpartziri in dus. Intru de sa relata personali andat totu beni, eus fueddau de dogna chistioni. S’agata una relata istitutzionali, aunia su solu interessu miu est cussu de difendiri is sardus e sa Sardigna. De sa mirada politiga, est craru, seus a s’imbessi: bieus su mundu cun ogus diversus e intru de totu custus mesis s’est bidu prus de una borta”.
Màuru Mura
Dominigu, su primu de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ilriformista.it/il-movimento-5-stelle-riparte-dalla-sardegna-verso-il-ticket-todde-conte-436810/
