“Scieus de nosi dda giogai cun dd’una scuadra forti e manna e de sa dificoltadi chi eus agatai cras in Napoli. Non si depeus scaresceri ca funt is campionis de s’Italia galu in carriga, de s’orrestu. Ma scieus finas can osi dda podeus giogai cun is fortzas nostras”.

Claudiu Ranieri pensat giai a sa partida cun su Napoli de Mazzarri, a pustis sa partida spantosa cun su Sassuolo. E castiendu a sa cuntierra de lunis passau agatati s fueddus po nai cussu chi no est andau beni e cicai de artziai sa spera: “Sa prima parti de lunis non mi funt pragius po nudda e sa spera mia est chi is piciocus apant cumprendiu cali funt is possibilidadis nostras e cumprendant finas aunia podeus fairi meglius. Depeus trabagliai ancora de prus de cussu chi seus fendu”.

Sa partida cun su Napoli est finas sa partida contras de s’allenadori beciu de su Casteddu, Walter Mazzarri: “Soi cuntentu meda chi siat torrau in sa citadi aunia iat fatu unu trabaglu mannu. Minesciat custa possibilidadi de pensu chi si dda siat gioghendu in sa manera meglius possibili”, narat Ranieri in s’atobiu cun is giornalistas in s’aposentu de su “Crai Sport Center” de Assemini. “At torrau a portai sa scuadra in su giogu chi connosciat meglius. Immoi is giogadoris de su Napoli si cicant e s’agatant totus cun prus facilidadi, si fragant cuasi. E ce dda fait a giogai cun lestresa manna”.

Su matessi Casteddu ce dda est fendu a giogai sempiri de prus a sa propria manera. “Ma deu creu – sighit a nai s’allenadori romanu – ca est de importu a mudai sempiri de prus su sistema de giogu. Tocat a strobai su giogu de sa scuadra chi nos agatau in denanti e cicai de fairi su giogu chi scieus fairi. E is piciocus, est a nai, in custu spetu mi funt agiudendu meda de averas. Scint giogai in prus de una manera”. A chini di pregontat de Lapadula, Ranieri spundit aici: “Est stetiu operau a su nasu. Est trabagliendu a una parti, a pustis eus a decidiri ponendu in mesu finas su dotori”.

 

 

 

Màuru Mura

 

 

Cenarba, su cuindixi de mesi de Idas de su 2023

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://www.punto-informatico.it/come-vedere-napoli-cagliari-in-streaming/