Intru de dexi dis, dominigu su binticincu de friargiu, is sardus ant a depiri votai po su Consigliu Regionali nou e is candidaus consiglieris e po presidentis si funt movendu in totue. Ma non feti ca de Roma funt lompendu is politigus natzionalis po cicai de agiudai chini ddue at postu sa cara. A pustis sa segretaria de su Partidu democratigu Elly Schlein, su capu de sa Lega Mateu Salvini e Carrulu Calenda de Atzione viva, atrus ant a lompiri in Sardigna a nai sa insoru.
Su centrudrestra est prontu a fairi calai a Casteddu totu is meris de Fradis de Italia, Fortza Italia e Lega po sustenni is chistionis de su candidau a guvernadori Pàulu Truzzu. Sa presidenti de su Consigliu de is ministrus Giorgia Meloni e is numurus de su guvernu Antoni Tajani e, un’atra bia, Mateu Salvini forsis ant a lompiri, totu paris, su bintunu de friargiu, cuatru dis a innantis de is eletzionis.
Finas su presidenti de is Steddaus Giusepu Conte at a lompiri in Sardigna po agiudai sa candidada de su Campu mannu Alissandra Todde. Su “leader” de is cincu steddas de cras at a girai po sa Sardigna e in tres dis at essi in Tatari, Nugoro, Aristanis e Casteddu. Sempiri cras e sempiri po cicai de agiudai a sa Todde erribat un presidenti de sa Manca Italiana Nichi Vendola. Su guvernadori beciu de sa Puglia lompit in Terranoa e in seugs s’at a agatai in atrus logus de Sardigna, sonumancu finas a dominigu chi benit.
Trabagliant che macus, e chena perunu agiudu chi lompit de s’Italia, is candidaus de sa coalitzioni de Soru. Feti Calenda est lompiu, et est a nai ca calencunu s’est chesciau.
Totu at acabbai su bintises de friargiu candu eus a tenni unu guvernadori nou e una giunta regionali ateretanti. Chi binciant is unus o is atrus sa spera est chi trabaglint po sa terra nosta, ma seus segurus ca is certus po is cadiras no ant a mancai. Comenti in donnia.
Màuru Mura
Mercuris, su catodigi de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.huffingtonpost.it/politica/2023/05/21/news/lanno_fratricida_salvini_contro_meloni_conte_contro_schlein_prepariamoci-12181270/
