De aunia s’agatat imoi at a cantai is cantzonis tataresas, sa musica punk newwave, cussa chi ddu at acumpangiau in s’urtimu tretu de sa vida sua. Genti a muntonis at prenu sa cresia de San Pio X in Li Punti po prangiri e saludai su musicu Bainzu Canu de cincuantases annus, chi non s’agataiat de s’otu de friargiu passau, e duncas aciapau chena de vida su dixianoi de su matessi mesi, in sa zona birdi de Piandanna in Tatari. Canu ddu iant bidu po s’urtima borta passillendu in sa zona intru de prassa Santa Maria e Piandanna. su babbu, ca non ce dda faiat a ddu agatai inderetura iat denuntziau a sa Politzia chi iat cumentzau sa cica. In segus, su dixianoi, gratzias a s’agiudu de is amigus chi ant umperau prus de unu droni, sa nova de disisperu.

In pissu de su baulu sa fotografia de su musicu e froris biancus e orrubius chi pigant sa forma de una chitarra, su strumentu prus caru de Canu chi at sempiri allogau cun cura e amostau a is amigus candu sonaiat. Sa beneditzioni de su piscamu de Tatari, Giuanni Francu Sata at donau su cumentzu a sa missa de s’interru, fata de Don Costantinu.

“Baizu at a cantai in su Paradisu comenti atrus artistas medas chi faint galanias de importu mannu in sa comunidadi”, at nau su piscamu tataresu. Saba at finas arreconnotu su trabagliu mannu de totu sa genti chi at cicau su musicu, a pustis chi non s’agataiat prus. S’intendit e s’est intendiu in cussas doxi dis a su costau de su babbu Perdu, de sa sorri e de su nebodi po su disisperu chi ant tentu.

Emotzioni manna e lambrigas a marigas candu is amigus ant fatu partiri sa cantzoni de Nick Cave, “The ship song”, sa preferia de su cantanti. In foras de sa cresia atrus duas cantzonis, scritas e cantadas de su musicu mortu paris a sa truma de is Atro, e atras duas cantzonis de Joy Division. Totu est acabau cun sa genti chi batiat is manus po saludai custu amigu de genti meda chi at essi dificili a scaresciri.

 

4 de martzu de su 2022

 

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.fanpage.it/attualita/la-misteriosa-scomparsa-di-gavinuccio-canu-il-cantautore-sparito-nel-nulla-a-sassari/