In is urtimas binticuatr’oras funt 17.981 is impestaus nous de su Covid in Italia, po cussu chi narat su ministeru de sa Saludi. Sa dì a innanti furint 30.629. Is mortus passant, in duas dis, de 144 a 207.

Sa percentuali de positividadi, cun 198.513 tamponis fatus in d’una dì, calat de su 9,6% a su 9%.

Sempiri in totu Italia calat de dixianoi su numuru de sa genti chi s’agatat in is terapias intensivas, nd’at imbucau trintanoi nous ma ndi funt bessius in cincuantotu. E calat, finas chi de pagu, su numuru de chini incecias est in is atrus aposentus de is spidalis: imoi funt 10.851, dixiaseti de mancu de sa dì a innanti.

Spantosu est su numuru, invecias, de chini s’est impestau de su cumentzu de sa pandemia, de dus annus a imoi: 12.782.836. Cussus chi funt impestaus in custas oras funt 1.099.934, calaus de 22.344 in is urtimas biticuatr’oras. Is bessius de is spidalis e is sanaus in dus annus funt 11.528.135.

Is numurus sardus invecias funt custus: 385, in pissu de 2.700 tamponis fatus, impestaus nous. Ma in Sardigna, tra eris e dì ainnantis is mortus funt medas su matessi: 13. Sa percentuali de is impestaus cun is tamponis fatus est de su 14,2% e crescit su numuru, de dus, de chini est in sa terapia intensiva: imoi funt bintises.

In is atrus aposentus de is spidalis abarrant ogualis: 337 e bessint de su incungiamentu in domu in 361 e imoi funt 30.932 cussus chi funt ancora acorraus.

Is trexi mortus funt tres feminas de setantacuatru, setantacincu e norantun’annus e dus ominis de setantatres e otantaseti chi biviant in sa citadi Metropolitana de Casteddu; duas feminas de otantases e norantot’annus e dus ominis de cincuantatres e otantun’annus de sa provincia de su Sud Sardigna; dus ominis de sessantacuatru e otantatres annus de sa provincia de Tatari; una femina de otantadus annus de sa provincia de Aristanis e un omini de setantot’annus de sa provincia de Nugoro.

 

Primu de martzu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto:https://www.ilgazzettino.it/italia/primopiano/omicron_reinfezione_dopo_la_guarigione_differenze_delta_covid_incubazione_news_oggi-6532995.html