Su Casteddu festat e agatat sa prima vitoria, de ocannu in sa Serie A, a su minutu de 87. Est Piccoli a decidiri sa partida, a pustis chi is grogusasulus de su Parma dda iant torrada a aciapiai unu minutu a innantis. Aici is piciocus de Nicola non funt prus is urtimus e andant a acostiai su matessi Parma, su Lecce e su Genoa a cincu puntus.
Davidi Nicola ponit in campu unu 4-2-3-1 comenti su matessi Parma, cun Viola a tres cuartus de campu. A pustis ses minutus de giogu Casteddu inderetura in gol cun Mina, ma s’arbitru, cun s’agiudu de su Var, non cumbalidat. Arrespundit su Parma cun Mihăilă, ma est su Casteddu a giogai meglius e difatis candu Luvumbo ponit in sa conca de Zortea una bocia de spantu, su Casteddu passat po sa borta unu. Sa prima parti de sa partida acabbat aici e su Casteddu podiat fairi finas un’atru gol, ma Piccoli nd’at boddiu su palu. Candu imbucant Almqvist e Coulibaly is parmigianus faint calencuna cosa de prus e difatis biora de s’oar de giogu paregianta po sa prima borta cun Man. Ma non s’arrendint is piciocus de Nicola, ca bolint portai in Sardigna is primu tres puntus e Marin, chi in su fratempus paris a Gaetano, Augello e Palomino funt imbucaus po Obert, Viola, Luvumbo e Mina, fait unu gol spantosu cun dd’unu tiru chi andat a acabbai aunia su palu cun sa traversa s’ingrugiant.
Non s’arrendint nemancu is piciocus de Pecchia e candu mancaiant tres minutus a s’acabbu, cun dd’unu tiru de is undixi metrus de Hernani torrant a ponni sa partida in paridadi. Chi, a dogna manera, addurat pagu tempus e difatis Piccoli, pighendusì una bella bocia donada de Gaetano, fait su gol de su 2-3 chi balit sa prima vitoria sarda de ocannu.
Immoi conca a sa partida de dominigu chi benit, candu su Casteddu at a giogai cun sa Juventus de Thiago Motta a mesudì e mesu, foras de domu finas custa.
Màuru Mura
Martis, su primu de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=Eu4NQOJgPE4
