“Nosu Progressistas non eus mai acabbau de s’impignai in custus mesis po acapiai sa coalitzioni de centrumanca, dividia in chistionis de manera prus che de miniscimentus”. Sa deputada Francisca Ghirra, chi est in sa Camera de su Parlamentu italianu cun su partidu de Massimu Zedda, fueddat de sa “cuntierra” chi si connoscit in su centrumanca intru de sa Todde e de Soru. “Dispragit – aciungit sa Ghirra – ca Arrenatu Soru sigat sa cursa chena imbucai a su aintru de sa coalitzioni, nendu de non tenni perunu interessu a is numurus eletoralis”. “No est a ponni atra genti in cadira, comenti narat Soru, ma de donai fortza noa a sa Sardigna. Seus galu prus chi a dispositzioni a fraigai paris un’alleantzia chi possat diventai una magiorantzia finas gratzias a s’agiudu de is fortzas autonomistas e indipendentistas po donai signalis a unu tempus nou de pesamentu economicu e sociali po s’Isula. Sa spera est de ddu fairi cun Soru e is atrus chi s’ant a bolli cun nosu”.

In su mentris lompint de Nugoro, intru de un’atobiu in sa zona de Pratobello, is fueddus de Soru po Alisandra Todde. Soru cumbidat sa Todde a un’atobiu pubricu, nendu ca est prontu a fairi unu passu a palas, po su beni de sa Sardigna, chi at a fairi su matessi issa, po agatai unu candidau in cumunu.

“Po acrariri custa cosa de chini non bolit s’unidadi – at nau Soru – cumbidu cras e totu Alisandra Todde a un’atobiu pubricu. Deu e issa po chini bolit s’unidadi e chini non dda bolit. Cali est su progetu de issa e cali est su progetu miu. Chi issa est a dispositzioni agataus unu chi nosi rapresentat totus et eus a tenni prus speras de binciri. Deu non soi su solu candidau possibili e nemancu su meglius, ci nd’at atrus e su beni de sa Sardigna est prus de importu de dogna atra cosa. Est lompiu su tempus de su ‘nosu’ e de ponni de una parti s’orrestu”.

 

 

 

Màuru Mura

 

 

Cenarba, su doxi de gennargiu de su 2024

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.corriere.it/politica/23_ottobre_26/soru-no-scambi-5-stelle-sardegna-primarie-o-vado-avanti-mi-candido-5f869840-742d-11ee-9f65-66f00d5f7a1b.shtml