Est unu Christian Solinas chi narat cun craresa cussu chi pensat e arrespundit a is fueddus de chini si nd’est andau de su Partidu Sardu de Atzioni, comenti de Giuanni Satta. Massimamenti ddu fait in is social cun scritus longus, in su mentri chi ancora no est acabbada sa chistioni de Alfonso Marras e Giuanni Chessa, chi eris funt in Roma setzius a su costau de su segretariu natzionali Antoni Tajani po ponni nieddu in biancu po s’imbucu in Fortza Italia paris a su collega Pieru Maieli.
“Si spaciat feti una chistioni chi est antiga: tres ominis bessius gratzias a is votus de una parti politiga chi passant a un’atra traigendu su sceberu de is eletoris. In totu custu non si podit agatai idealis, cultura politiga e nemancu rispetu po sa storia: est feti cosa chi cumbenit a issus e totu!”, at cumentzau a scriri Solinas.
Is arrespustas non si funt fatas aspetai a longu, comenti cussa de Giuanni Satta, chi cumbidat a Solinas a si castiai a intru de sei: “De unidixi consiglieris non dd’est abarrau mancunu: no est chi calencuna cosa ddas faddia tui?”, narat a su segretariu natzionali de su Psd’Az e presidenti beciu de sa Regioni finas a friargiu passau.
Chi, a dogna manera, non si fait pregai a chistionai: “No est pensada bona chi si sigat, cun custus fueddus de pipiu, de scarrigai totu in pissu de su presidenti totu cussu chi no at funtzionau in is cinc’annus passaus a su cumandu de sa Regioni e de nai ca totu cussu chi s’est fatu est miniscimentu de is consiglieris. Sa beridadi est a s’imbessi: in su mentris chi su presidenti at trabagliau cuindixi oras in dogna dì de sa cida, e at tentu arresurtaus chi si podint agatai in is numurus e in is paperis, su Consigliu regionali est stetiu cussu chi at fatu de mancu in totu sa storia de s’autonomia sarda”.
Sighit ancora Solinas: “In su mentris chi deu trabbagliaia po ponni is contus in regula, is consiglieris pensaiant a si cumpartziri su dinari po prassigeddas e passadisus, in festas e sotzius piticus. Boleus nai a is sardus ca in donnia chi su presidenti mandaiat a su Consigliu calencunu progetu o pensada de lei is capus trumas arrespundiant sempiri nendu cantu ci godangiaiat su Consigliu”.
Màuru Mura
Mercuris, s’undixi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.lastampa.it/politica/2024/01/18/news/solinas_sacrificato_in_sardegna-14005691/
